IAFF president a ṭawng fimkhur

International Asso­ciation of Athletics Fe­de­­rations (IAAF) presi­dent Lord Coe chuan August 4-13 chhunga neih tur World Athletics Championships chu thianghlim leh felfai vek ni tura a tiam theih loh thu a sawi chhuak.

London-a neih tur he infiamna khawmpui lianah hian hrem tuar lai Russia chu hrem tlang an ni dawn a, an athlete zingah dan leh hrai zawm famkim an awm erawh chuan neutral athlete ni chungin an inlan ve thei ang. Tun hnaiah hian Russia chauh ni loin ram hrang hrang infiammite zingah damdawi hman phal loh hmang an awm nual tih hmuh chhuah a ni.

IAAF president Coe chuan, "Dan bawhchhiat tum an tam ṭhin hle, uluk taka endikna neih a nih pawh hian hmuh hmaih palh a awm thei. Hei vang hian inelna dik, fel leh famkim chu duh mah ila hetiang thlap erawh a ni ngei ang tih kan tiam thei lo," tiin a ṭawng fimkhur hle.

Coe chuan sawi chhun­zawmin, "Nakin hun atan chuan infiamna dik famkim kan chhawp chhuah theih ka beisei, chumi tur chuan hma pawh kan la mek. A endik tur pawl din a ni a, an hmalakna hi hlawhtling nghal vek lo mah se nakinah chuan a hlawhtlinna kan la hmuh ngei ka beisei," tiin a sawi.