Champion tum Chelsea, City, United leh Arsenal Hriatthiam har Liverpool leh Tottenham
Premier League club tana nipui transfer tawp hun chu September 1, zing dar 3:30 a ni a, hun tam a awm tawh lo.
Champion lai Chelsea, Manchester khaw club pahnih City leh United bakah Arsenal ten nomawi chawi an duh tih an lantir tawh laiin Liverpool leh Tottenham Hotspur te erawhin chhuanpui tham player an la lalut lo.
Manager ngai
Season liam ta khan Premier League-ah khawvel manager lar an zuang lut a, hei vang hian season dang aiin ngaihven a hlawh leh zual a ngaih a ni.
Chelsea-in Juventus-a hlawhtling tawh leh Italy manager Antonio Conte an chang a, khawvel manager ṭha ber ang hiala an sawi hman Pep Guardiola-a'n Manchester City-ah chona thar a hmachhawn.
United-in an hmelma City elphak an duh avangin FA Cup champion puitu Louis van Gaal banin Dutch manager aiah Pep-a nena inel tawk tur Jose Mourinho an lalut ve bawk.
Arsenal-in English football-a tawnhriat nei ṭha Arsene Wenger an nei sa a, Liverpool-in German manager langsar Jurgen Klopp hnuaiah season chanve dawn an lo khel tawh a, Tottenham-in Argentine manager Mauricio Pochettino hnuaiah khelh dan phung nghet an nei tawh.
Khawvel manager ṭha rual awm khawmnaah Conte a dingchang a, Chelsea-in nomawi an chawi. Mourinho leh Pep-a ten league-ah beisei an pha lo a, season khatna chauh a nih avangin anmahni chhawrtute an chungah zah an ngai.
Arsenal manager Wenger pawhin a hna chan a duh lo a nih chuan result ṭha a mamawh a, club hotute lamin pressure an pek nat loh ber tura ngaih Reds manager Klopp leh Spurs manager Poch te tan pawh Champions League khelh phak tal a ṭul dawn.
Tun season-ah club lianin manager ngai vek an chhawr dawn a, nomawi chawi tum vek an nih miau avangin season tawp daih lo pawh awm theih a ni a, nipui transfer hian nghawng thui tak a nei ang.
Tum nei Wenger
Arsenal supporter ṭhahnem takin an duh tawh loh Arsene Wenger-a'n a club hmangaih chhuahsan a la tum lo a, tum nei ranin contract a pawtsei. Gunners-in tlarhma tichak turin Alexandre Lacazette an lalut a, French forward hi Arsenal history-a player manto ber a ni a, kum dang zawng aiin transfer-ah Wenger a huaisen bawk.
Lyon aṭanga an lakluh Lacazette aia lian chu French manager hian season khat chiah contract nei tawh Mesut Ozil leh Alexis Sanchez te chhuahtir mai a tum lo a, sum hloh pawi a ti lo. Transfer tawp ni thlenga Chilean forward Alexis hi an chelh a nih chuan Wenger-a'n season dang zawng aiin champion a duh tih a lantir ang.
Pa rorum Conte
Chelsea champion-na kawngah striker rorum Diego Costa a khel ṭha a, Spain international striker hi khelmual chhungah sawiselna tur a awm lo. Amaherawhchu, manager Antonio Conte berin hmun pawimawh chantir a tum tawh lo a, Italian manager hian a thlakna turin Alvaro Morata a lalut thlap tawh bawk.
Blues-in league-ah champion nawn an tum a, transfer lian pathum nei tawhin pound maktaduai 130 bawr vel an seng tawh. Chelsea hi league-a champion nawn turin an ṭha a, amaherawhchu Costa leh Nemanja Matic te dinhmun chian loh vangin Champions League an thlir tel a nih chuan squad tihchhah erawh a la ṭul ang.
Pressure ngah Pep
Manchester City manager Pep Guardiola-a'n fiahna vawi khatna a paltlang loh hnuah team thar din a tum a, an chak lohna ber tlarhnung phei chu a thar hlaka rem a tum niin a lang.
City hian champion ngei tumin pound makataduai 200 an hmang tling tawh a, hming langsar ṭhahnem tak an chhuak bawk. Spanish manager hian sum a hman tam avangin pressure a ngah zual dawn a, chutihrualin a player lakluh hi ṭha chho tur an nih hlawm avangin league nomawi an chawi a nih chuan Barcelona leh Bayern Munich-a league nomawi a chawi ṭum aiin a dah san theih zawk ang.
Mourinho a ngai
Manchester United manager Jose Mourinho-a'n a mamawh a hria a, a duhzawng player lakluh nan sum sen a hreh lo. Portuguese manager hian nomawi a keng tel a ngaih a ni a, chumi tur chuan tun hma aṭangin sum a hmang hnem ṭhin bawk.
Mourinho hian team ṭha din turin player pali a mamawh thu a sawi a, pahnih a lalut tawh. United chief executive Ed Woodward-a'n manager duh dan hi a tihhlawhtling a nih chuan Mourinho-a'n nomawi nen a chhan let a ṭul dawn a ni.
Ngaihtuahawm Reds
Liverpool-in playoff an paltlang chuan Champions League group stage an khel dawn a, Europe-a an sulhnu ṭha chhawm nun paha league lama che ṭha tur chuan Jurgen Klopp-a hote hi transfer-ah an reh mah mahah a ngaih theih.
Reds hian manto takin Mohamed Salah an lalut tawh a, Chelsea-a hlawhchham tawh player hi chhuan tham a tling lo. Kumina neih zawh tak FIFA U20 best player Dominic Solanke lah naupang mai a la ni a, Hull City aṭanga an lakluh Andrew Robertson a danglam tam lo.
Liverpool hi Southampton defender Virgil Van Dijk leh RB Leipzig midfielder Naby Keita nen sawi zawm an la ni ve reng a, lalut ta reng pawh ni se champion tur zinga chhal ngam an harsa ang.
Sum ren Spurs
Tottenham Hotspur-in stadium thar an sa dawn a, season tharah Wembley Stadium chu home match khelh nana an hman dawn avangin an hmabak a hautak dawn hle.
Spurs hian player hlawhah kar khatah nuai khat aia sang an pe lo a, stadium thar sa tur an nih bawk avangin player ṭha bik an lakluh a rinawm loh. London club hian City lakah Kyle Walker an chan tawh a, United lak tum Eric Dier erawh an hum theih a rinawm.
Mauricio Pochettino hote hian khelh dan phung nghet an neih avangin team ṭha zingah an tel dawn a, amaherawhchu champion thei tur khawp squad an neiin a lang lo a, Champions League an khel pha a nih pawhin result ṭha a ni ang.
Arsenal
LUT
Sead Kolasinac Schalke Free
Alexandre Lacazette Lyon £46.5m
CHHUAK
Wojciech Szczesny Juventus £10m
Kaylen Hinds Wolfsburg £2m
Chelsea
LUT
Alvaro Morata Real Madrid £58m
Tiemoue Bakayoko Monaco £40m
Antonio Rudiger Roma £29m
Willy Caballero Manchester City Free
CHHUAK
Nathan Ake Bournemouth £20m
Juan Cuadrado Juventus £17.3m
Asmir Begovic Bournemouth £10m
Bertrand Traore Lyon £8.8m
Christian Atsu Newcastle United £6m
Nathaniel Chalobah Watford £5m
John Terry Aston Villa Released
Dominic Solanke Liverpool Released
Liverpool
LUT
Mohamed Salah Roma £34m
Andrew Robertson Hull City £8m
Dominic Solanke Chelsea Released
CHHUAK
Lucas Leiva Lazio £5m
Kevin Stewart Hull City £5.4m
Andre Wisdom Derby County £2m
Manchester City
LUT
Benjamin Mendy Monaco £52m
Kyle Walker Tottenham Hotspur £50m
Bernardo Silva Monaco £43.6m
Danilo Real Madrid £26.5m
Ederson Benfica £34.9m
Douglas Luiz Vasco de Gama £10m
CHHUAK
Pablo Zabaleta West Ham Released
Gael Clichy Basaksehir FK Released
Jesús Navas Free agent Released
Willy Caballero Chelsea Released
Bacary Sagna Free agent Released
Enes Unal Villarreal £12m
Aaron Mooy Huddersfield Town £8m
Nolito Sevilla £7.9m
Aleksandar Kolarov Roma £4.5m
Olivier Ntcham Celtic £4m
Ruben Sobrino Alavés £1.8m
Manchester United
LUT
Romelu Lukaku Everton £75m
Victor Lindelof Benfica £31m
CHHUAK
Wayne Rooney Everton Undisclosed
Adnan Januzaj Real Sociedad £9.8m
Josh Harrop Free agent Released
Tottenham Hotspurs
LUT
An la awm lo
CHHUAK
Kyle Walker Manchester City £50m
Nabil Bentaleb Schalke 04 £16.8m
Clinton N'Jie Marseille £6.1m
Federico Fazio Roma £2.8m
Note : Player langsar chauh tarlan an ni