Vidal a chhuak lo ang - Ancelotti

Bayern Munich ma­nager Carlo Ancelotti chuan a midfileder pahnih chung­chang a sawi a, Arturo Vidal chu a chhuah dawn loh thu a sawi rualin Renato Sanches-a hma hun erawh a chiang lo niin a sawi.

German champion hian tun hnaiah midfielder pahnih Corentin Tolisso leh Sebastian Rudy te bakah playmaker James Rodriguez leh forward Serge Gnabry te an lalut tawh a, report ṭhenkhatah chuan an neih sa an chhuah ṭhen dawn nia sawi a awm.

Italian manager An­celotti chuan, "Vidal hi a chhuak dawn lo, a chhuah theihna kawng a awm lo a ni. Kan player duhlai a nih avangin kan hnenah a cham chhunzawm ang tih hi 100%-in ka chiang," tiin a sawi.

Chile international Vidal hian kum 2015 khan Juventus aṭangin Allianz Arena a pan a, season hnih chhungin inelna hrang hrangah match 88 khelin goal 16 a khung tawh.

Hetihlai hian beisei phak lo Portugal inter­national Sanches chung­chang sawi zawmin Ancelotti chuan, "Nipui bazar hi August 31-ah a tawp dawn a, engpawh la thleng thei a ni. Tunah chuan Renato hian kan hnenah training a nei mek a, a chungchangah thutlukna kan la siam lo," tiin a sawi.