Lionel Messi dah sangtu Valverde

Barcelona coach thar Ernesto Valverde chuan Lionel Messi chu a player dangte aia ṭha chungchuang bik a nih thu a sawi a, tun hnaia sawi hlawh tak Neymar chuan La Liga club tan a khelh chhunzawm zel a beisei thu a sawi bawk.

Catalan club hi season thar inbuatsaih nan United States-ah an awm mek a, Ningani zing dar 5:00 hian Manchester United nen International Champions Cup an khel dawn, inkhel hi Ten 2-ah live a ni ang.

Barca hian an match hmasa zawkah Neymar-a goal hnih hmangin Italian champion Juventus chu 2-1 in an hneh tawh. Turin club an hmachhawn ṭum hian tlarhmaah Messi, Neymar leh Paco Alcacer te an inkawp a, second half-ah striker Luis Suarez a inlan bawk.

Argentina captain Messi chung­chang sawiin Valverde chuan, "Messi hi ka hmuh chhuah thar a ni lo, tun hma aṭang tawhin mitin hriat sa a ni a, ani hi chuan khelmual chhungah a tih tur a hre vek. Ball thunun a thiamin tlanpui hun a hria a, rang takin a

ṭhiante a hmu zung zung bawk," tiin Barca tana goal khung hnem ber chu a dah sang vet vet hle.

Hetih lai hian Spanish ma­nager hna hi a awlsam dawn lo. Messi a fak viau lai hian ṭha inti ve tawk tak Neymar chelh hi hna pawimawh leh hautak pakhat a ni mek. Brazil captain hi Ligue 1 club hausa Paris Saint-Germain nen an sawi zawm mek.

Kum 53 mi Valverde chuan Ney­mar chungchang sawi zawmin, "Kan player duhlai a ni a, kan hnena cham turin kan duh avangin he club tan hian a khelhzui zel pawh ka beisei. A chanchina thulengvel tam tak hi chu belhchian dawl lo a ni a, club-ah hian hmun pawimawh a chang chhunzawm ang," tiin a sawi.