West Ham-ah Chicharito a lut ta

Premier League club hma­sawn tum West Ham United chuan German club Bayer Lever­kusen aṭangin striker Javier Hernandez chu pound maktaduai 16-in an lalut. Chicharito tia an koh ṭhin Mexico international hian London Stadium-ah kum thum cham turin contract a ziak.

Manchester United striker hlui Chicharito hian West Ham player hlawh hnem ber ni turin karkhatah £140,000 a hlawh dawn. Arsenal player hlawh hnem ber Mesut Ozil nen an hlawh a inzat dawn tihna a ni. Hammers hian an player man to ber ni turin Stoke City striker Marko Arnautovic (£20m) an lalut hlim chauh bawk a, an tlarhma thuam chak an tum hle.

Kum 2010 khan Hernandez hian Man United a zawm a, Old Trafford-a a cham chhungin match 156 a khelhah goal 59 a khung sak. Kum 2015 August thla khan pound maktaduai 7.3-in Leverkusen a zawn a, Bundesliga club tan hian match 76 khelin goal 39 a khung sak bawk.

Kum 29 mi Hernandez chuan, "Premier League hi khawvela league ṭha ber a ni a, he hmuna kal theihna hun ṭha ka neih kha ka bawhpelh phal lo a ni. West Ham hian sulhnu an nei ṭha a, thil tum thui tak an nei bawk, chuvangin he hmunah hian ka rawn kal," a ti.

Mexico tana match 96 a khelh aṭanga goal 48 khung thei striker chuan sawi chhunzawmin, "England bakah Spain leh Germany-ah tawnhriat ka nei tawh. Heng league lian zingah hian England hi football sulhnu ka neih len tawhna hmun a ni a, he hmuna ka rawn kir leh thei hi ka lawm hle," tiin a sawi.

Season hmasaa beisei phak lo West Ham hian insiamṭhat an tum hle, striker pahnih Chicharito leh Arnautovic te bakah Manchester City leh England goalkeeper Joe Hart chu loan hmangin an hawh fel tawh a, City aṭang vek hian defender Pablo Zabaleta chu free transfer-in an laut tawh bawk.

Welsh sumdawng hausa David Sullivan leh English sumdawng mi David Gold ten kum 2010 January thla aṭangin West Ham-ah neitu nihna an nei a, thuneihna an chan hnuah Hernandez hi striker 33 an leina chiah a ni. An striker lei tawh zinga 20 zet chu goal thum aia tam khung phak loin an zuih ral. Tunah chuan Chicharito leh Arnautovic te fiahin an awm ve leh thung dawn a ni.