Indian Super League ; Mizoram aiin Manipur players an tam zawk

November 17-ah Indian Super League khelh ṭan a ni dawn a, Pathianni khan ISL draft neih a ni tawh. India rama league ngaihven hlawh berah hian ramchhung players 156 an inlan dawn a, hmarchhak state aṭanga ISL khel tur zat chu 50 a ni.

Manipur-in players 20 thawhin hmarchhak aṭanga players thawh hnem ber an ni a, Mizoram-in players 16 thawhin Manipur an phak lohna zat hi players pathum a ni. Sikkim-in players paruk an thawh a, Meghalaya-in players pali thawhin Assam lam chhuak players pathum an awm bawk.

Hmarchhak state zingah Tripura, Nagaland leh Aru­nachal Pradesh ten players thawh an nei ve lo.

Draft-a tel dan

ISL-a khel tura draft-a awm tur hian "Ka ṭha ve tawk' tia mahni insawi luh ngawt theih a ni lo. ISL hotute leh football agent ten indawrna an kalpui a, ISL club-ten draft neih hma hauhin player-te an lo dawr lawk thei bawk. Mahse, thutlukna erawh draft-ah siam chauh tur a ni thung. Professional football-ah chuan footballer-ten anmahniin thutlukna an siam ngawt lo a, agent an nei ṭhin.

India ramah chuan Libero Sports, Get Pro, Football So­lutions leh Football Edge-te hi agency lar an ni a, an hnuaiah players inziak lutin players contract leh engkim an buaipui ṭhin.

Agency-te hian ISL draft-a an player-te tel turin ISL hotute inbiakna neihpui a, inremna an neih chuan draft-ah telh an ni. ISL scouts a hranpain an awm bawk a, anni hi India ramah zin kualin tournament an buatsaih leh en aṭangin player-te chu draft-a tel turin an sawm a ni.

Manipur maw?

Manipur players zingah Ma­lennmgamba Meitei, Su­shil Meitei, Reagan Singh leh Seminlen Doungel ten North­East United tan an khel dawn. Amar Tamar Kolkata-ah Ronald Singh leh Bipin Singh, Bengaluru-ah Udanta Singh, Thongkhosiem Haokip leh Boithang Haokip, Chennaiyin-ah Thoi Singh leh Dhanachandra Singh.Delhi Dynamos-ah Seityasen Singh leh David Ngaihte, FC Goa-ah Chinglensana Singh, Kerala Blasters-ah Jackichand Singh, Milan Singh, Loken Meitei, Pritam Kumar Singh leh Siam Hanghal te awmin Jamshedpur FC-ah Yumnam Raju a khel bawk ang.

ISL club zingah FC Pune City leh Mumbai City chu Ma­ni­pur players kawl lo awm c hun an ni a, Amar Tamar Kolkata leh FC Goa-in players tam lama Manipur hnaih bertu Mizoram players an kawl lo thung.

Manipur tam chhan

I League-ah Aizawl FC an champion a, 2nd Division I League-ah Manipur club NEROCA FC an champion thung. Aizawl FC-in I League nomawi an chawi avangin an players ṭhate chân nual mah se ISL-ah erawh players an thawh tam phah hran lo a; NEROCA player ten 2nd Division I League champion an nih an chhawr thung.

NEROCA nen kum nga thawk dun tura inremna siam hlim NorthEast United-in an lakluh Malennmgamba Meitei leh Sushil Meitei-te hi NEROCA player an ni.

Aizawl FC-in I League nomawi chawi mah se an player pawimawh Lalramchullova, Laldanmawia Ralte leh Brandon VL Remdika ten ISL pan aiin East Bengal tana khelh an thlang a, anni hian ISL-a khelh thlang ngat se chuan Mizoram players an pung ang.

Zohmingliana Ralte leh Lalruatthara-te hi I League champion team-ah tel mah se ISL club lo nei tawh ṭhin an ni. Mizo players zingah Kerala Blasters defender Lalṭhakima chu I League champion vanga ISL khela ngaih theih awm chhun a ni mai awm e.

Bengaluru FC-in AFC Cup khel tura an chelh Daniel Lal­hlimpuia hmalam hun a la chiang tawk lo a, tun din­hmunah erawh a hming tarlan theih a ni lo. Hei vang hian ISL-ah Mizoram player an tam tur angin an tam tawk lo.

Zo hnahthlak Val

Manipur-in ISL-a players an thawh tam chhan hi uluk taka thlir chuan Zohnahthlak vang tih hai rual a ni lo.

NE United forward Seminlen Doungel, Bengaluru FC-a khel tur pahnih Thongkhosiem Haokip leh Boithang Haokip bakah Delhi Dynamos winger David Ngaihte-te hi Zo hnahthlak vek an ni.

Chumi awmzia chu Mani­pur-in ISL-ah players 20 an nei tih a nih rual hian Zo hnahthlak players pali an awm tihna a ni a, anni chhiar tel loh hian Mani­pur-in players 16 an thawh.

Mak angreng tak chu I League khel thei club pathum lai nei tawh Meghalaya-in players pali chiah an nei hi a ni. Meghalaya player-te hi ATK players Eugeneson Lyngdoh leh Rupert Nongrum, Blasters defender Samuel Shadap leh Mumbai City defender Aiborlang Khongjee-te an ni.

ISL-a North East players awm dan
NorthEast United FC
Malennmgamba Meitei (Manipur), Sushil Meitei (Manipur), Fanai Lalrempuia (Mizoram), Reagan Singh (Manipur), Seminlen Doungel (Manipur), Robert Lalthlamuana (Mizoram), Lalrindika Ralte (Mizoram), Nirmal Chettri (Sikkim), Holicharan Narzary (Assam).
Amar Tamar Kolkata
Eugeneson Lyngdoh (Meghalaya), Rupert Nongrum (Meghalaya), Ronald Singh (Manipur), Kunzang Bhutia (Sikkim), Bipin Singh (Manipur).
Bengaluru FC
Udanta Singh (Manipur), Malsawmzuala (Mizoram), Lalthuammawia Ralte (Mizoram), Zohmingliana Ralte (Mizoram), Thongkhosiem Haokip (Manipur), Boithang Haokip (Manipur).
Chennaiyin FC
Jeje Lalpekhlua (Mizoram), Jerry Lalrinzuala (Mizoram), Thoi Singh (Manipur), Dhanachandra Singh (Manipur).
Delhi Dynamos FC
Lallianzuala Chhangte (Mizoram), Lalhmangaihsanga Ralte popularly known as Sena Ralte (Mizoram), Seityasen Singh (Manipur), Vinit Rai (Assam), David Ngaihte (Manipur).
FC Goa
Chinglensana Singh (Manipur)
FC Pune City
Lalchhuanmawia Fanai (Mizoram), Isaac Vanmalsawma (Mizoram), Nim Dorjee Tamang (Sikkim).
Kerala Blasters FC
Jackichand Singh (Manipur), Milan Singh (Manipur), Lalruatthara (Mizoram), Loken Meitei (Manipur), Samuel Shadap (Meghalaya), Pritam Kumar Singh (Manipur), Lalthakima (Mizoram), Siam Hanghal (Manipur).
Mumbai City FC
Aiborlang Khongjee (Meghalaya), Pranjal Bhumij (Assam), Sanju Pradhan (Sikkim), Lalchhawnkima (Mizoram).
Jamshedpur FC
Robin Gurung (Sikkim), Bikash Jairu (Sikkim), Jerry Mawihmingthanga (Mizoram), Yumnam Raju (Manipur), Sairuatkima (Mizoram).