MFA Super Cup hmanga MPL club bihchianna

MFA Super Cup 2017 khelh zawh a ni ta a, inelna ṭan hmaa champion rinkai Chhinga Veng FC an champion.

July 28, Zirtawpni aṭangin I Day Football khelh ṭan a ni dawn a, hemi zawh hian Mizoram Premier League khelh chhunzawm a ni dawn. MFA Super Cup hian inelna lian pahnih khelh hmabakah hian nghawng lian tak a neih a rinawm.

Goal 300!

Team 63 inelna MFA Super Cup-ah hian match 62 khelh aṭangin goal 300 a lut a, match tinah goal 4.84 lut ang a ni. MFA leh District FA hnuaia club inang lo tak tak telna a nih avangin goal a lut tam hi a mak lo.

I Day Football-ah chuan match khata goal lut zat hi a tlahniam tawh dawn a, chutihrualin MFA Super Cup final-a Chhingcows-in Chan­mari West 5-0 ngawta an sawp avangin goal luh tamna inkhel erawh a la awm thei.

Rindik a awl

Chhinga Vengin nomawi chawi tumin Santosh Trophy-a Mizoram coach Lalsangzuala Hmar an lalut a, an duhzawng player an lakluh zel bawk avangin champion rinkai an ni nghal.

Mawlmang taka thlir pawhin Chhing­cows hi champion tura rinkai an ni a, chutihrualin awlsam taka champion erawh an ni bik lo. Training ṭan hma lamah Chhinga Veng-in Mizoram Police chiah an tluk lo a, coach Lalsangzuala Hmar-in hmasawn duhin an khingpuite inkhel Lammualah ngei a zir chiang a, tehna pahnih aṭanga thlirin team thawkrim ber an ni.

Chhinga Vengin match ruk an khelh aṭangin goal 46 an khung a, match tinah goal 7.67 an khung. Chhingcows hian goal an khung tam bakah khelmual chhungah game mawi an khelh bawk avangin MFA Super Cup champion tur ring dik an tam khawp ang.

West Warrior

Mi tam tak beisei loh taka final lut Chan­mari West tawp khar dan a lawm­awm loh a, tlarhnung thawm ṭhat an mamawh hle.

West Warrior hian MFA Super Cup final an thlen avanga an lungawi a nih chuan an hmabak a êng lo. Foreign defender an lakluh theih chuan nomawi an beisei chhunzawm zel ang.

I League club

Tualchhung club zinga I League khel thei awm chhun Aizawl FC-in India ram an champion ṭuma an player pawimawh bik zingah captain Alfred Kemah Jaryan chiah an chelh thei.

AFC hian Minerva Punjab aṭang­in Kareem Omolaja Nurain lalut mah se tualchhung football-ah ro an rel theih a rinawm bik lo a, Mizoram Police laka an chak zo lo pawh thil mak a ni lo - ṭan lak an mamawh.

Police hmabak

Mizoram Police-in inpuah­chahna an nei ṭha a, MFA Super Cup aṭanga teh an la harsa. Ṭialthawnga hote hian an khelh ṭhat loh ṭumah Chanmari West penalty shootout hmangin an hneh lo a, an vanduaiah a ngaih theih. Chutihrualin an tlarhnung erawh a pawp tih zep rual a ni lo.

Ramhlun North hi

Season liam ta khan Ramhlun North-in I Day Football final an lut a, MPL-ah relegation playoff an khel thung. Tun season-ah MPL club hi an inla ṭha a, amaherawhchu Aizawl FC Academy lakah an tlawm.

Ramhlun North ṭhatna tak a la lang lo a, result ṭha nei tur chuan huaisenna an mamawh ang.

BVT leh Dinthar

Bethlehem Vengthlang FC-in champion zui ta Chhinga Veng goal khat chiahin an hneh lo a, Dinthar FC-in finalist Chanmari West penalty shootout-ah an hneh lo.

BVT-in Chhingcows an chhaih buai pha a, goal khung tur striker erawh an mamawh. Dinthar FC-in an mamawh an nei kim a, an budget mila squad an din hi an tuai hriam a ṭul dawn a ni.

Kalphung thar Chanmari

Chanmari FC-in coach H. Van­lalthlanga hnuaiah kalphung thar an nei a, tawnhriat nei ṭha aiah hmabak nei êng player an thlang.

Veteran coach Thlanga thil tum hi a fuh tawk lo thei a, chutihrualin MFA Super Cup aṭanga teh erawh a dik bik lo. Chanmari hian penalty shootout-ah Aizawl FC an hneh lo nghal a, I Day Football-a beisei an pha lo nawn a nih chuan foreigner hmanga team thuam ṭhat an mamawh ang.