Real Madrid-ah Ronaldo a cham dawn

Santiago Bernabeu chhuah­san tur anga thawm a neih reng hnuah Real Madrid forward Cristiano Ronaldo a ṭawng chhuak ve ta. Kum 32-a upa forward chuan, "He club tan hian nikuma nomawi ka chawi ang khan chawi leh ka duh a ni," a ti a, Real tana a nomawi chawi tawh sa ho chu a la duhtawk lo.

Ballon d'Or chawimawina vawi li lai dawng tawh Ronaldo hi Paris Saint-Germain, Chelsea leh Manchester United nen sawizawm a ni hman a, Real fan-te thin thiin an mu thei lo - tunah erawh hahdam takin an mu leh thei tawh ang.

Irh chhuahna

June 2017-ah khan Ronaldo hi maktaduai tel chhiah awl ruah puh a ni a, puh a nihna avang hian a lungawi lo hle. Ronaldo ṭhian hnai tak chuan, "Cristiano hian a rinawmah a inngai a, nungchang ṭha leh dan ang thlapa engkim kalpui vek ṭhin mi a ni. Dik lo taka puh a nihna avangin tun dinhmunah chuan a lunghnur takzet a, Spain-a awm zel hi a duh lo. Chhuah a duh a ni," tiin a sawi.

Portugal captain aiawhten Ronaldo-a'n chhuah a duh thu Portuguese chanchinbu A Bola hnenah an hrilh a, anni hian lian takin an ram chhuanvawr lungawi loh thu hi an ziak nghal. Ronaldo aiawhten he chanchinbua Ronaldo chhuah duh thu a lan hnu lawkah Spanish chanchinbu lian zawng zawng an be vek a, an player lungawi loh thu an hrilh vek.

An hlauthawng

Mahni tawka player induh ve tak Ronaldo-a'n chhuah a duh thu a sawi avangin Real Madrid an hlauthawng tih hai rual a ni lo a, pound maktaduai 350-a lei huam an awm a nih chuan hralh an phal niin an sawi hial. Real Madrid president hlui Ramon Calderon chuan, "A thinrim lai taka a thusawi pawh a ni mai thei asin," tiin beiseina chau tak nen Ronaldo cham a beisei thu a sawi ngam ṭawk.

Hetiang boruak karah Man­chester United, sum lama buai lo PSG leh Chelsea hming a ri reng bawk si a, Ronaldo ber a ngawi tlat bawk - Real ṭan­tuten an hlauthawng kha a awm lo hran lo a, tunah erawh an hahdamna tur thu a sawi ta.

Champion duh

Season hman zawh takah Real-in La Liga leh Champions League nomawi an chawi a, Ronaldo chuan season hmasaa an ropuina ang hi chhawm nun a duh thu a sawi. Real-ah ka cham dawn tiin sawi lo mah se Spanish club tan nomawi chawi zel a la duh thu a sawi miau avangin Santiago Bernabeu-ah cham a duh, tihah rinhlelh tur a awm tawh lo.

Kum 32-a upa forward chuan, "Season hmasaa Real tana champion nomawi chawi kha a nuam takzet a, mimal chawi­­mawina dawn pawh kha a nuam hle. Season liam taa kan hlawh­tlinna ang kha neih leh ka duh a ni," a ti a, Real-ah a cham dawn.

A la tawk lo

Portugal tan vawi 143 inlana goal 75 khungtu Ronaldo-a'n football khawvelah mimal chawimawina dawn theih ang zawng zawng a dawng vek a, club-a nomawi chawi theih zingah chawi loh a nei tawh lo. Hetichung hian Portuguese forward hian duhtawk mai a la tum lo a, a hma zawng aia thawhrim a tum thu a sawi.

Ronaldo chuan, "Rim taka i thawh reng a ṭul a, kum tinin a hma aia rim lehzuala i thawh a pawimawh. Keipawhin chutiang tak chuan ka beih chhunzawm zel dawn. Football hi ka nunna a ni a, a nuam ka ti a ni," a ti.

Ballon d'Or pangana?

Cristiano Ronaldo hian season hman zawh takah club tan Champions League leh La Liga nomawi a chawi piah lamah mimal tak pawhin a che ṭha hle. Inelna hrang hrangah match 46 khelin goal 42 a khung a, khawvela football thiam ber Ballon d'Or chawimawina dawng tura rinkai ber a ni leh der tawh.

Ronaldo hian Ballon d'Or hi a dawng leh a nih chuan a vawi nga nan he chawimawina hi a dawng dawn tihna a ni a, dawn tam lamah Barcelona forward Lionel Messi a tluk chiah bawk ang. Chutihrualin Messi thaibo ngawt erawh a harsa. Copa del Rey-a Barca champion puitu hian inelna hrang hrangah match 52 khelin goal 54 a khung a, mimal takin Ronaldo chu a khumah ngaih ni mah se Manchester United forward hlui erawhin Champions League leh La Liga a neih kawp avangin a buk rit deuh zawk tura ngaih a ni.