Confederations Cup khel Player an filhlim - FIFA

Khawvela football thuneitu sang ber FIFA chuan July thla tira khelh zawh tak Confederations Cup khel player zingah damdawi hman phal loh hmang an awm loh thu a sawi chhuak.

Khawmualpui hrang hrang champion-te inelna Confederations Cup 2017 khel tur khan player 379 an kal khawm a, inelna hi nakkum FIFA World Cup thlenna tur Russia-a khelh a nih avangin kawng khatah chuan World Cup enchhinna anga ngaih a ni bawk.

FIFA chuan thuchhuah siamin, "Player inlan zawng zawngte kha an inkhelh dawnah an zun leh thisen endik vek a ni a, inkhelh banah team pakhat aṭangin palyer pahnih zel endik nawn an ni bawk. Kan endik zingah dan bawhchhia an awm lo," an ti.

Inelnaah khan Ger­many, Chile, New Zea­land, Australia, Came­roon, Mexico, Portugal leh a thlengtu Russia te an inel a, final-ah Germany hian Chile hnehin nomawi an chawi.

Nikum khan Russia hi an sorkar hriatpuina hnuaiah an infiammi ten dan an bawhchhia tih hmuhchhuah a ni a, hei vang hian ṭum dang zawng aiin nakkuma neih tur World Cup atan FIFA a fimkhur zual hle.