A vawi hnih nan Cassano-a'n a chawlh thu a puang

Italy international hlui Antonio Cassano chuan football a chawlhsan thu a sawi nawn leh ta. AS Roma leh Real Madrid forward hlui hian tun thlatir khan a chawlh tur thu a lo sawi tawh bawk.

Kum 35 mi Cassano hian July 10 khan Serie A club Hellas Verona a zawm a, club thar a neih aṭanga ni riat hnu lekah inkhelh a chawlhsan thu a puang. Mahse, a rilru thlakin darkar khat hnu lekah chona thar hautak hmachhawn chhunzawm a tum thu a sawi leh lawi si!

Amaherawhchu, a inkhelh zui tur thu a sawi aṭangin ni ruk chiah a la liam hman a, season thar inbuatsaih nan match hnih chiah an khel hman tihin a chawlh thu a puang nawn leh ta a ni.

Cassano hian Italy tan match 39 khelin goal 10 a khung a, nikum May thla hnuah league match a la khel leh lo. Kumin January thla khan a khelhna Sampdoria chuan an chhuah zalen a, Thawhṭanni khan a nupui Carolina Marcialis-i'n club thar an zawn tur thu a sawi chu thu takah a chang zo dawn ta lo tihna a ni.

AC Milan tan pawha khel tawh Cassano chuan, "Ka nupuiin ka hma hun changchang a sawi kha chu a dik lo. Antonio Cassano hian football a khel leh tawh ngai lo ang," tiin a sawi.

Cassano hi Italy-a khawpui pakhat Bari-a piang leh seilian a ni a, a naupan laiin a pa chuan an chhungkua a chhuahsan avangin a nu in rethei takin a ṭûl pui. A naupan laiin kawtthlerah ball a pet ṭhin a, Italian club pakhat FC Bari scout-te chuan a theihna sanzia hmu fuhin youth team-ah an hruai lut a, heta ṭang hian professional career bul a ṭan.