Mohun Bagan-ah Player thar pahnih
I League club Mohun Bagan-in Thawhṭanni-a player panga ngawt an lakluh hnuah pawh an la duhtawk chuang lo a, nimin khan player pahnih an lak belh leh ta. Mariners hian winger pahnih Israil Gurung leh Nikhil Kadam an lalut.
Kum 2015-a Portuguese club Vitoria de Guimaraes B team a zawm avanga hriat hlawh tak Israil Gurung hi a khelhna Pune City FC hotute nen an inhmuhthiam loh avangin hun engemaw chen chu khelmualah a hmel inlan loin hun a hmang tawh a, Bagan-ah a theihna pholan theih a inbeisei ang.
Nikhil Kadam hi kum 23 chauha upa niin Indian player beiseiawm ber pawla sawi a ni ṭhin a, mah se khup hliam a neih reng avangin a lar tirha 'beiseina' ang erawh a phak rih lo hle. Pune FC leh DSK Shivajians tan pawha lo khel tawh winger hian season hman zawh tak kha Mumbai FC-ah hun a hmang a, mahse I League-ah erawh a inhamtanpui zo lo - Mohun Bagan-ah beiseina a sang dawn.
Kolkata club hian I League khelh hmain Calcutta Football League an khel phawt dawn a, Shankarlal Chakraborty enkawlna hnuaiah awm mekin Mizo left back Ricky Lallawmawma an lo lalut tawh bawk.