Transfer a tawp hnai - Eng nge la thleng thei?
European League hrang hrangah season thar a inṭan tawh a, result ngaihnawm tak tak a awm tawh a, European football ngaihnawmna belhchhah turin transfer hun a la inhawng bawk.
Nipui bazar hi September 1, Ningani zanah a tawp dawn a, league hrang hrang transfer bazar tawp hun darkar erawh a inang kher lo. Thil chiang erawh transfer lian tham a la thleng dawn a, chanchin ngaihnawm a la awm dawn.
Premier League bikah result-in transfer boruakah nghawng lian tak a nei niin a lang. Manchester United chu Brighton leh Brentford laka an mualpho hnuah transfer-ah thawm an nei ring sawt a, chutiang bawkin Leeds laka tlawm Chelsea pawhin thawm an nei lian hle.
Chutihrualin champion lai Manchester City erawh school naupang a huna lehkha zir ṭha, exam laia awm hahdam tawh ang maiin an hna an zo tawh. City el-tawk ber tura rin Liverpool erawhin season bul an ṭan fuh lo a, transfer tawp lamah mangan bazar a awm lo ang tih pawh sawi a har hle.
Transfer ti ngaihnawmtu
Arsenal
• Pedro Neto nen an sawizawm
• Pepe chhuah dan tur an dap
Chelsea
• Fofana, Aubameyang leh Gordon te nen an sawizawm
• De Jong a beiseiawm loh, squad tih thawl a ngai
Liverpool
• Squad tih chhan nan player an mamawh
• Jude Bellingham an nghak sual ang em?
Manchester City
• Bernardo Silva a cham dawn
• City-in an duh ang player an nei tawh
Manchester United
• Cristiano Ronaldo hmalam hun
• Tlarhma ti chak turin Antony leh Gakpo
• De Gea thachhang dawl turin Trapp
• Maguire a nghet
Pakhatna nih tum Arsenal
Premier League-a pakhatna dinhmun hauh mektu Arsenal-in match thum an khelh tawha an chak vekna kawngah an player thar Gabriel Jesus leh Oleksandr Zinchenko te an ṭangkai hle. Arsene Wenger awm loh hnua Premeir League nomawi an chawi leh theih nan squad inthuam chak an la tum.
Gunners technical director Edu leh manager Mikel Arteta ten squad thuam chak dan an la ngaihtuah. Bournemouth an hneh zawhah Arteta chuan, "Team-a danglamna thlen thei tur kan la thei a nih chuan kan la inlak belh ang. Kan duh tak player kan la thei lo a nih chuan tuna kan player-te chungah hian rinna kan nghat ang," tiin a sawi.
Gunners hi Wolves winger Pedro Neto leh Leicester City midfielder Youri Tielemans nen sawizawm an la ni. Wolves manager Bruno Lage chuan thuthang hi hre ve bawk mah se indawrna kalpui a nih loh thu a sawi. Tielemans erawh Leicester-in an phalna zat an tihniam niin thuthang a awm. Foxes hian Tilemans manah £30mtd chuang hret vel an la phut a, Arsenal-in £25mtd man velah an ngai, chutihrualin player contract chungchang erawh buai lo tura ngaih a ni.
Arsenal-in player thar an lak theih nan inṭhuah fai an mamawh a, Nicolas Pepe chu loan hmangin French club Nice-ah a kal ang.
Inthuam chak mamawh Chelsea
Chelsea-in Premier League bul ṭan nan Everton an hneh a, Tottenham lakah point khat hlawh chhuak mah se Leeds United lakah 3-0 in an mualpho. Blues hi season liam ta khan pathumna ni mah se Manchester City elpha tur emaw champion nomawi beisei pha tur emaw chuan inthuam ṭhat an mamawh hle.
London club hian Napoli aṭangin Kalidou Koulibaly leh Brighton aṭangin Marc Cucurella lalut mah se tlarhnunga player pawimawh Antonio Rudiger leh Andreas Christensen te an chan tih hriat a ṭha. Chelsea hian tlarhnung thuam chak nan Wesley Fofana chungchangah Leicester City an dawr mek. Foxes hian Blues-in ṭum thumna atana an dilna pound maktaduai 70 chu an hnawl tih manager Brenden Rodgers chuan a nemnghet. Fofana hian chhuah a duh avangin kar liam ta khan training-naah a kal lo a, reserve team zinga training turin sawn a ni bawk.
Blues hian tlarhnung chauh thuam chak an tum lo a, tlarhma lamah Pierre Aubameyang leh Everton winger Anthony Gordon nen an la sawizawm. Barca-in a thlawna an lak Aubameyang manah hian euro maktaduai 30 an beisei a, Chelsea ngamna zat aiin a tam - club pahnih hi an la indawr mek.
Chelsea-in kum 21 mi Gordon lakluh theih an inbeisei. Gordon hian London club pan a duh thu a tichiang tawh a, Blues-in Everton forward manah pound maktaduai 60 an pe ngam. Premier League match 52 aṭanga goal l chiah la khung Gordon manah hian Chelsea an inseng huai hle.
Tuchel-a'n midfield thuam chak a duh a nih chuan Frenkie de Jong lak theih turin a awm a, Dutch midfielder hi a hlawh a san avangin Stamford Brigde-a kal tur chuan a hlawh a tihniam viau a ṭul thung ang.
Blues hi an la inpaih thawl dawn bawk. Emerson Palmieri-a'n Hammers a zawm tawh a; Callum Hudson-Odoi, Conor Gallagher, Marcos Alonso, Hakim Ziyech, Christian Pulisic, Trevoh Chalobah, Michy Batshuayi, Kenedy, Ross Barkley leh Baba Rahman te pawhin Emerson leh Timo Werner te hnungzuiin Stamford Bridge an la chhuahsan thei bawk.
Liverpool-in Jude Bellingham an duh
Liverpool-in English centre midfielder ṭha mi Jude Bellingham an duh tih chu tlang hriat a ni a, mahse kumin lam ni lovin nakkum lam a ni thung. Thuthang awm danah chuan tun nipui bazara Reds-in Bellingham hi an la dawn a nih chuan pound maktaduai 146 an sen a ṭul ang.
Kum 18 mi Bellingham hian June 2025 thleng contract a nei a, transfer bazara sumdawng thiam tak Dortmund-in English midfielder hi thlawm têa chhuah an tum lo ang. Chutihrualin Liverpool erawhin inthuamṭhat an mamawh tih Manchester United an hmachhawn ṭum aṭangin a chiang a, Sadio Mane hmunruak an luah khah zawh loh bakah midfield a thawl bawk.
James Milner leh Jordan Henderson te aia ṭha an mamawh a, an la thei lo a nih chuan Reds ṭantute beiseina tur chu Thiago leh Naby Keita ten hriselna ṭha an neih a ni ang. Chutihrualin Keita hi chhuak thei dinhmunah a ding a, a chhuak a nih chuan midfielder chu an lalut ngei ang.
Liverpool mamawh chhanna tur chu Jude Bellingham a ni a, Reds hian an khawl bawm an chhu keh ngam lo a nih chuan English midfielder ṭha hi an chân thei bawk. Bellingham duhtu zingah hian Real Madrid pawh an tel a, nakkum nipui bazarah chuan Reds elpui tur chu Los Blancos an ni thei tlat.
Man City an in la fel tawh
Manchester City chuan nipui bazarah Erling Haaland, Kalvin Phillips leh Sergio Gómez te an lalut. January thlaa an lakluh, mahse loan hmanga an chhuahtir nghal Julián Álvarez an lalet tawh bawk. City-in champion nawn an tum a, chutihrualin player pawimawh an chhuahtir avangin kum hmasa lam aiin an squad a chhah zawk em, tih chu inhnial theih tak a ni.
Transfer lamah erawh an hna an zo tawh tawh tih Pep Guardiola-a'n a sawi. Man City manager Pep chuan, "Tun dinhmunah chuan kan lei belh tawh loh a rinawm zawk. Mahse chhuak an awm emaw harsatna dang hriat lawk loh emaw a awm a nih chuan ngaihtuahna kan seng ṭha leh ang," tiin transfer chungchang a sawi.
Man City tana buaina awm thei chu Bernardo Silva a ni a, Portuguese midfielder hi Barcelona nen sawizawm a ni. Tunah erawh Bernardo hi chhuak lo tura ngaih a ni tawh. Silva hian a chhuah duh thu sawi lang chiah lo mah se Etihad Stadium chhuahsan a duh tih chu football ngaihven chin chuan an hria. A pawimawh ber erawh Pep-a'n Silva hi a duh a, tun season-ah pawh City tan hmun pawimawh a chang ang.
Man United-ah Antony leh Gakpo?
Season bul ṭan chhia Manchester United-in zahna khur aṭanga vanram tlafuala tual chai turin an hmelma Liverpool an hneh tawh. Erik ten Hag an neih bawk avangin United ṭantuten beiseina thar an nei a, club neituten club ṭantute lawmna siam nan sum thehchhuah an inhuam viau niin a lang bawk.
United hi nipui transfer inhawn ṭantirhin Frenkie de Jong nen sawizawm a ni a, tun thlengin an la la thei lo. Mahse, United hi transfer laia nilum ai mai mai an ni bik lo - Tyrell Malacia, Christian Eriksen, Lisandro Martínez leh Casemiro te an lalut tawh.
Lawmna belhchhah turin Liverpool an hneh ṭumin Malacia, Eriksen leh Martinez te an che ṭha vek a, Casemiro lah a ṭha tih hriat sa a ni. Khelmual chhunga United phurna hi khelmual pawn lamah a rawn lang chhuak.
United hian Ajax aṭangin Brazilian forward Antony manah euro maktaduai 80 an thehchhuak phal a, Dutch club-in an hnawl - pound maktaduai 100 an beisei. English club an la beidawng lo a, euro maktaduai 94 velah inremna a awm theih rin a ni. Anthony hi player special bik a ni a, phurna tham a tling ang.
Anthony an la thei lo a nih chuan PSV forward Cody Gakpo chu harsatna hranpa nei loa la thei tura ngaih an ni a, Dutch forward hi euro maktaduai 50 man a ni. PSV hi United striker hlui Ruud van Nistelrooy a enkawl a ni a, hna a awlsam thei ang. Thuthang awm lehah chuan United hian Anthony hi la thei pawh ni se Gakpo pawh hi an lalut dawn tho tih a ni leh tawh.
United hian tlarhma tih chak nan Christian Pulisic chu loan hmangin an la dawn tih a awm bawk a, Anthony emaw Gakpo emaw an lak theih chuan American forward hi an lak kher a rinawm loh. Hetihlai hian De Jong-a'n United-in Instagram-a Casemiro an lakluh thu an post chu a lo 'like' a, hei hian sawizui a hlawh hle. Mahse, United hian midfielder an ngah tawh bakah an player-te hlawh a tam hlawm avangin Dutch midfielder De Jong hi chu thuthang mai ni tawhah a ngaih theih.
United hian centre forward an zawng tiin sawi a awm a, Atletico Madrid forward Alvaro Morata chu an duh zawng ni mah se a man a to hret a, an bawhzui a rinawm loh. Goalkeeper-ah David de Gea an nei a, Spanish keeper hi a hlawh tam viau mah se tihsual chang nei a ni a, thachhangdawltu a mamawh bawk. United hi German keeper Kevin Trapp nen sawizawm a ni. Engpawhchu nise United hian player an lakluh ngei hmel a, transfer tingaihnawmtu an ni chhunzawm ang.
Player lakluh bakah hian Ten Hag hian a squad paih thawl dan a zawng bawk. Season liam taa hlawhtling taka Nottingham Forest-a loan-a khel James Garner chu chhuak thei zinga mi a ni a, defender Eric Bailly pawhin loan hmangin Marseille a zawm bawk ang.
United captain Harry Maguire erawh Chelsea nen sawizawm ni mah se a chhuak dawn lo. England defender Maguire hian khelhna hmun chan tumin theihtawp a chhuah a ṭul dawn a ni. Cristiano Ronaldo hming sawi hmaih a thiang lo. Portugal captain hian a hmalam hun chungchangah thupuan tur a neih thu a sawi tawh a, Bruno Fernandes pawhin a hriatpui thu a sawi bawk. Liverpool laka bench-a ṭhu Ronaldo hi chhuak thei dinhmunah a la ding reng.
Nipui transfer bazar hi June 10 aṭang khan hawn ṭan a ni a, September 1, 2022-ah khar a ni dawn.
Transfer Window
Premier League
England-ah chuan anmahni hunah September 1, Ningani zan dar 11:00-ah khar a ni dawn. Keini hunah chuan September 2, Zirtawpni zing dar 3:30-ah a tawp thung ang.
La Liga
Spain-ah chuan club-in player lalut fel turin September 1, zan dar 10:59 thleng hun an nei. India sanaah chuan September 2, zing dar 3:29-ah a tawp ang.
Serie A
Italy-ah pawh September 1, Ningani zanah transfer a tawp ang.
Bundesliga
Germany-ah September 1, tlai dar 5:00-ah an khar fel dawn a, keini hunah chuan zan dar 9:30-ah an khar ang.
Ligue 1
France-ah chuan transfer hun hi September 1, zan lai dar 11:59-ah
a tawp dawn a, keini hunah chuan
zing lam dar 4:29 a ni daih dawn.