Canelo-a'n Golovkin chawlhtir a tum

Boxer rothap Canelo Alvarez chuan a vawi thum nana Gennady Golovkin nen an intawn leh hunah, Kazakhstani boxer Golovkin chu a boxing glove kalsan duhna thinlung pu duh tur khawpa hneh a châk thu a sawi.

Alvarez chuan, "Golvkin hi ka ngainat zawng a ni lo. Chawlhtir ngei chu ka thil tum a ni - ka tan chuan kan inhnek leh tur hi mimal thil a ni tawh. Vawi tam ka chungchang a sawi a, hei vang hian kei chuan mimal inbeihnaah ka ngai tawh a ni," a ti.

Kum 32 mi Alvarez leh kum 40 mi Golovkin hi September 17 khian a vawi thum nan an intawng dawn - boxer pahnih vawi hnih an lo intawn tawhah Alvarez hi vawi khat a chak a, vawi khat an inhnehtawk.

Mexican Alvarez chuan, "Ka hmaa a awmin engmah a sawi ngai lo. Golovkin hi ka zah em em a, a career pawh ka zah hle - mahse, hmun danga a thil sawi leh interview-naa a thil sawite hi engtin nge ni ta ang?" a ti a, a chungchang thu a sawi danah a lawm lo.

Alvarez chuan T-Mobile Arena, Paradise, Nevada, USA-a an inhnek tur thlir lawkin, "Round 12-na kan thlen hmain ka tukdawl ang tih ka ring. Golovkin tukdawl tur hian ka thiamna leh tawnhriat zawng zawng ka hmang dawn a ni," a ti.

WBA (Super), WBC, IBF leh WBO super middleweight title zawng zawng kawltu Alvarez hian a inhnek hnuhnung berah hnehna a chang zo lo - Dmitry Bivol lakah a tlawm a, mahse, he inhnek atan hian light-heavyweight-ah a insawn chho a, a tan a sang hret niin a lang.

Alvarez chuan, "Ka tlawmna avang khan fighter hlauhawm zawk ka ni tawh. Ka fight hnuhnung ber aṭang khan ka danglam tawh a, ka puitling sawt a, ka chakin ka inringtawk em em bawk a ni," a ti.

Weight division palia champion thei Alvarez hian light-heavyweight-ah inhnek leh a tum thu a sawi a, chutihrual chuan tun atan chuan Golovkin chiah a ngaihtuah thu a sawi bawk.

Alvarez hian vawi 61 fight hmachhawn tawhin vawi 57 hnehna changin vawi hnih a tlawm a, vawi hnih draw a nei - a tlawm pakhat hi kum 2013-a Floyd Mayweather a ngam loh kha a ni a, a career-a a tlawm vawi hnih nan Bivol lakah khan a tlawm leh a ni.

Mexican boxer chuan, "Light-heavyweight-a inhnek leh ngei ka duh. Mahse, tunah chuan 100% in Golovkin-ah ka rilru ka pe a, May thlaah light-heavyweight lam ka hawi leh ang," a ti a, chawlh a la ngaihtuah rih loh thu a sawi tel bawk.