Djokovic a tel loh chuan a lem ngawt ang - John McEnroe
US Open vawi li champion tawh John McEnroe chuan Novak Djokovic-a'n New York khawpui a pan thei lo a nih chuan mak a tih tur thu a sawi a, world number 1 hlui hi a tel thei lo a nih chuan fiamthu ang mai a nih tur thu a sawi bawk.
August 29, Thawhṭanni aṭang hian Flushing Meadows, New York-ah US Open hi khelh a ni dawn. Grand Slam vawi 23 champion tawh Serena Williams tan hun hnuhnung a ni dawn bawk a, inelna hian ngaihven a hlawh dawn chiang.
Novak-a dinhmun
Hripui lengin khawvel a tibuai a, kum thum deuh thaw chu khawvelin a buaipui tawh. Natna hrik tihdamna damdawi la siamchhuah ni lo mah se, a laka invenna leh hri kai palh pawha na tuar a ziaawm theihna tur vaccine erawh an siam chhuak tawh.
Vaccine hi mi tam tak chuan lak ngai an ti lem lo, chawpchilh taka siam a nih avangin nakinah taksa tana thil ṭha lo la then thei tura an ngaih vang a ni. Invenna la duh lo zingah hian Novak Djokovic pawh a tel.
Serbian star hian ama duhthua la duh lo ngawt chu a ni bik lo, mimal doctor a nei thlap a, damdawi lam thiam bik a be rawn ve tho ang tih chu thil chiang a ni, chumi hnuah a tennis zinkawng tidanglam tur pawh ni se vaccine lak loh a thlang zawk.
A theih loh
Ram hrang hrangin inkaihhruaina dan leh hrai zawm tur an nei. Hripui leng vanga inkaihhruai dan a inang lo viau, ram ṭhenkhatin an phal zau viau laiin ram ṭhenkhat erawh an inkharkhip hle thung - United States pawh an inhawng zau rih lo.
Tun dinhmunah chuan United States zin lut tur hian, ram dang mi tan chuan Covid-19 vaccine lak ngei a ngai, invenna an la tih finfiahna an nei a nih loh chuan zin luh ngawt theih a ni lo - Djokovic tan New York a pan theih rih lo tihna a ni.
Australia ram pawhin US kalphung ang tho hi an hmang. Kumin January thla khan Novak hi a inkhelh ve an phal lo, inkhel turin Melbourne khawpui erawh a thleng hman, mahse mipui nawrna leh dan kenkawh an duh avangin an thawn haw leh nghal.
Beiseina chu
US rama damdawi lama thuneitu US Centers for Disease Control and Prevention (CDC) chuan an dan hi an ennawn ve reng a, tun kar tawp lama inkaihhruaina thar a chhuak a nih chuan ram dang mi zin lut tur chungchang hi an thlahdul rinna a lian hle.
An kalphung pangngai ang a nih erawh chuan Djokovic tan kawng an hawng lo ang. Serbian tlangval hian March thla khan Indian Wells leh Miami Masters a khel thei lo a, tun hnai khan Cincinnati Open a khelh theih loh phah ṭhak tawh bawk.
US mi leh sate hi vaccine la lo pawh ram dangah an zin chhuah phalsak tho an ni a, hei vang hian an dan hman lai hi sawiseltu pawh an tam. August 11 khan inkaihhruaina ṭhenkhat an thlahdul tawh a, Novak leh a fans lam chuan thlahdul zual an beisei mek a ni.
McEnroe a ṭawng
US Open vawi li champion tawh John McEnroe chuan, "Novak Djokovic-a'n US Open a khel thei lo a nih chuan a fair lo tihna a ni ang. He hripui leng hi kum hnih leh a chanve aia rei kan buaipui tawh a, a hnathawh leh awm dan chu kan hrechiang tawh.
"Kei chuan vaccine ka la a, buaina ka nei hran lo. Amaherawhchu, vaccine la ve duh lohte ngaihdan hi kan zahsak ve bawk tur a ni ang," tiin a sawi a, tun dinhmuna world number 6 chu New York khawpuia hmuh theih ngei a beisei.
Djokovic-a ṭantu mi tam takin hma an la mek a, he thilah hian mi 50,000 chuangin an thlawpzia lantir nan hming an ziak (petition an sign) tawh. Djokovic pawhin amah ṭantu leh thlawptute chunga a lawmthu hi twitter kaltlangin a sawi tawh bawk.
Tel lo ta se...
Grand Slam champion hnem lamah Djokovic hian Roger Federer (20 titles) a tlan pel tawh - Wimbledon 2022 champion a nih chiah khan major title 21 a nei tling tawh, a chungah hian vawi 22 champion tawh Rafael Nadal chiah a awm.
Australian Open a khelh theih lohnaah Nadal a champion a, tunah Djokovic a inlan thei lo a nih pawhin US Open-ah Nadal chu a inlan thei dawn. Grand Slam champion hnem ber nih tum tan chuan tournament khelh theih a pawimawh hle.
Djokovic hi kum 35 mi a ni a, a elpui Nadal hi kum 36 mi a ni thung - an kum inkar a zau lo. Spanish star hi hliam vangin a buai fo a, eng chena rei nge a inkhelh theih dawn chu hriat a ni lo - player pahnih hi an inti chak tawn zel chuan a rinawm.
Serena duhsaktu Martina Navratilova
Tun season zawh rualin Serena Williams-i'n tennis chawlhsan a tum a, tennis legend Martina Navratilova chuan Serena hian a hun hnuhnungah US Open nomawi chawi ngei se a duhsak tih a sawi.
American star Serena hian 1999 khan a Grand Slam title hmasa ber turin US Open nomawi a chawi a, a hnuah major title dang 22 a lak belh. Grand Slam champion hnem ber Margaret Court chu nomawi pakhatin a phak lo mek.
Singles huanga Grand Slam nomawi 18 chawi thei Navratilova chuan, "Tennis ka chawlhsan kha kum 1993 daih tawh a ni. Khami season khan a tawp hmain ka chawlh tur thu ka sawi lawk, tuna Serena-i'n a sawi ang tho hi a ni.
"Ka chawlh tur ka sawi hnu kha chuan engkim mai kha a danglam, tournament ka khelh dawnte kha ni dang a ang thei tawh lo reng reng, a nawm viau rualin a harsa tel ve bawk. Chuvangin Serena dinhmun tur hi ka hrethiam khawp mai," tiin a sawi.
A chawlh tur thu a sawi hnuah Serena hi Toronto leh Cincinnati Masters-ah a inlan a, beisei a phak lo. Cincinnati-ah phei chuan hneh nei loin a tla nghal, fans lamin ṭan viau mah se a tan chet ṭhat ngawt theih a ni bik lo.
American legend chuan Serena duhsakna hlan zuiin, "A taksa bakah a rilru a nghawng tih chu phat rual lohin a lang. Serena tan chuan US Open hi a pawimawh em em a, a bik takin kumin hi a pawimawh zual - nomawi nen a hun hnuhnung hmang turin ka duhsak," a ti.
