Champions League khel tur Benfica

European football season a kal chho mawp mawp a, football ngainatute nghahhlelh em em ṭhin Champions League khelh hun pawh a hnai leh ta - a khel tur pawh a hriatkim theih ṭep ta.

Champions League qualifying pawh khelh chhoh zel a ni a, playoff round an thleng tawh. Qualifier aṭangin club paruk chu Champions League group stage khel tura tling leh tur an ni a, he thu buatsaih a nih lai hian club pathum an tling chiang tawh a, nizan khan pathum dang a chiang leh dawn - result kan hre hman lo.

Season thara Champions League khel turin Benfica an tling a, Portuguese club hian Thawhlehni zan khan Dynamo Kyiv chu 3-0 in an hneh - first leg-ah 2-0 in an lo hneh tawh bawk a, inkhel pahnih belhkhawmah 5-0 a chakin CL khel turin an tling chiang hle.

Hetihlai hian Czech champion Viktoria Plzen chuan 2-1 a Qarabag hnehin an tling ve bawk a, Israeli champion Maccabi Haifa FC chuan aggregate-ah 5-4 a Red Star Belgrade hnehin Champions League an khel dawn bawk.

Hei le Benfica
Season hman zawh takah khan Benfica hi league-ah pathumna an ni thei hram a, Primeira Liga club hian season thara Champions League khel turin qualifier an khelh a ṭul phah a, third round aṭangin inelna an hmachhawn ṭan.

Benfica hian nipui transfer-ah player langsar tak tak chân zuiin, an chân langsar zingah Liverpool striker thar Darwin Núñez a tel. Mahse, Portuguese club hi an talbuai phah lo.

Champions League qualifier third round-ah FC Midtjylland chu inkhel pahnih belhkhawmah 7-2 ngawta sawpin an pet chhuak a, aggregate-ah 5-0 a Dynamo Kyiv hnehin an tlang leh ta.

Benfica hian second leg-a goal thum an khung hi first half-a an khung vek a ni a, Manchester City defender hlui Nicolás Otamendi, Portugal international Rafa Silva leh nipui transfer-a an lakluh David Neres te chuan goal khat ṭheuh an khung - season 13 chhunga a vawi 12 nan Champions League an khel dawn.

Maccabi an inlar
Israeli club Maccabi Haifa chuan first leg-a 3-2 a an hneh hnu Red Star Belgrade chu khualmualah 2-2 in an inhnehtawkpui a, inkhel pahnih belhkhawmah 5-4 a chakin, kum 2009 hnua a vawi khat nan Champions League group stage khel turin an inpetkai.

Serbian champion Red Star tan Aleksandar Pešic leh Mirko Ivanic te chuan minute 43 chhungin goal hnih an khung hman a, an tlang mai rinna a lian hman hle - mahse, Maccabi tan Daniel Sundgren chuan first half hun pek belhah si phurh a sut ṭhen a, Red Star defender Milan Pavkov chuan minute 90-naah an lamah tilut zuiin, extra time khelh ngai loin Maccabi zawk an tlang ta daih.

Azerbaijan champion Qarabag-in first leg-ah goal khung loin an mikhual Viktoria Plzen an chelh a, khualmualah Filip Ozobic hmangin Czech club ṭha lakah hian goal an khung hmasa bawk - beiseina an nei hman.

Mahse, Viktoria Plzen-in mahni muala tlawm duh loin, second half-ah Jan Kopic leh Jan Kliment hmangin an chhanglet a, 2-1 a hnehna changin, Champions League khel turin an inpetkai - season hmasa lawka Europa Conference League qualifier paltlang zo lo team tan chuan result ṭha chungchuang a ni.

Champions League Playoff Results
August 16, Thawhlehni Zan
Champions Path - First Leg
Bodø / Glimt 1 - 0 Dinamo Zagreb
BOD: Amahl Pellegrino 37'
FC Copenhagen 2 - 1 Trabzonspor
COP: Viktor Claesson 9'; Lukas Lerager 48'
TRA: Anastasios Bakasetas 79'

League Path - First Leg
Rangers 2 - 2 PSV Eindhoven
RAN: Antonio Colak 40'; Tom Lawrence 70'
PSV: Ibrahim Sangaré 37'; Armando Obispo 78'

August 17, Nilaini Zan
Champions Path - First Leg
Qarabag 0 - 0 Viktoria Plzen
Maccabi Haifa 3 - 2 Red Star Belgrade
MAC: Frantzdy Pierrot 18', 51'; Tjaronn Chery 61'
RSB: Aleksandar Pešic 27'; Guélor Kanga 39'

League Path - First Leg
Dinamo Kyiv 0 - 2 Benfica
BEN: Gilberto 9'; Gonçalo Ramos 37'

August 23, Thawhlehni Zan
Champions Path - Second Leg
Viktoria Plzen 2 - 1 Qarabag
VIK: Jan Kopic 58'; Jan Kliment 73'
QAR: Filip Ozobic 38'
*Agg-ah 2-1 in Viktoria an tlang
Red Star Belgrade 2 - 2 Maccabi Haifa
RSB: Aleksandar Pešic 27'; Mirko Ivanic 43'
MAC: Daniel Sundgren 45+5'; Milan Pavkov 90' (OG)
*Agg-ah 5-4 in Maccabi an chak

League Path - Second Leg
Benfica 3 - 0 Dinamo Kyiv
BEN: Nicolás Otamendi 27'; Rafa Silva 40'; David Neres 42'
*Agg-ah 5-0 in Benfica an chak

Nizan Inkhel (Result kan hre hman lo)
Champions Path
Trabzonspor 12:30 AM FC Copenhagen
Dinamo Zagreb 12:30 AM Bodø / Glimt

League Path
PSV Eindhoven 12:30 AM Rangers