EFL Cup: League Two club lakah Fulham an tlawm!

Premier League kai thar Fulham-in an league match hmasa pathumah Liverpool an hmachhawn tel chungin tlawm an nei lo a, point nga ngawt an nei tawh - an 'puja' fuh lai tak a ni.

Mahse, football-in beisei loh thawnthu min hlui fo ṭhin a, Fulham 'puja' a fuh reng thei bik lo - rin loh taka league lama 2-2 a Liverpool chelhtu team hi League Cup lamah club tenauin an lo barakhaih ve thung a, Crawley Town chuan 2-0 in an lo hneh!

League Two club talbuai Crawley tan hian Tom Nichols leh James Balagizi te chuan goal khat ve ve an khung a, Fulham lamin a chhanletna tur an neih loh avangin League Cup chu second round-ah an mangṭha fel der.

Hetihlai hian Premier League club Aston Villa, Everton, Nottingham Forest, Leicester City, Wolverhampton Wanderers, Crystal Palace, Bournemouth leh Southampton te erawhin an khingpui ṭheuh hnehin, third round an inpetkai thung.

Barakhaih
Fulham-in an match hnuhnung berah Brentford chu 3-2 in an hneh a, Inrinni zanah Premier League hmahruaitu Arsenal an lenchilh zui dawn avangin coach Marco Silva-a'n Brentford-a inlan aṭangin player 10 ngawt a thlak danglam.

Fulham tan kum 19 mi Jay Stansfield chu bul ṭan nawn awmchhun a ni a, an hmachhawn tur hi League Two club an nih miau avangin Silva thutlukna dem theih a ni lo. Mahse, League Two table-a 23-na ni mek Crawley-in hei hi hun ṭhaah ngaiin tha tho takin bul an ṭan.

Minute 16-na lekah Nichols chuan goal hmahruai a khung a, minute 49-naah Liverpool aṭanga loan-a an hawh Balagizi tan a siamsak zui - England Under-19 international hian minute 49-naah chak nemnghehna goal a khung.

Fulham midfielder hlui, Crawley manager Kevin Betsy chuan, "Zan duhawm tak a ni - club tenau Crawley Town-in Premier League club Fulham kan hneh a, a awihawm loh zawk a ni," a ti.

Inkhel dang
Premier League-a beisei phak lo Aston Villa-in an thinrimna Bolton Wanderers lakah an hri thla a, 4-1 in an chak. League One club Bolton tan Dion Charles chuan goal hmahruai khung mah se Villa hian Douglas Luiz, Danny Ings (penalty), Lucas Digne leh Leon Bailey hmangin an chhanglet a, an chak chiang.

Frank Lampard enkawl Everton pawhin chak turin harsatna an tawk lo a, League One club Fleetwood Town chu khualmualah Demarai Gray goal hmangin 1-0 in an hneh. Nottingham Forest-in goal thum khungin League Two club Grimsby an pet chhuak a, Forest tan Sam Surridge chuan goal hnih a khung a, Ryan Yates chuan goal khat a khung bawk.

Premier League match thuma chak la nei lo Leicester City-in League Two club Stockport laka hnehna chang turin vanneihna an mamawh a, hun pangngaiah goal an khung loh hnuin penalty hmangin 3-1 in an chak hram.

Foxes goalkeeper Daniel Iversen chuan Leicester tana a match hmasa berah penalty vawi thum a dang a, a team hi a chakpui - Foxes tana pet zingah James Maddison leh Ayoze Perez ten an chhuih lut lo.

Hei le Palace
Aston Villa hneh hlim Crystal Palace an kal zel a, kartawpa Manchester City nena an inkhel tur inpuahchah nan Oxford United chu 2-0 in an hneh - Odsonne Edouard leh Luka Milivojevic (Penalty) ten goal khat ve ve an khung.

Norwich City-in Bournemouth lakah Jordan Hugill leh Adam Idah goal hmangin vawi hnih ngawt hma an hruai a, mahse, Cherries tan Emiliano Marcondes leh a vawi khat nana inlan Brooklyn Genesini te chuan si phurh an sut zel a, a tawpah penalty hmangin 5-3 in an chak.

Southampton tan League One club Cambridge United laka chak turin harsatna a awm lo a, Che Adams goal hnih leh Dominic Ballard-a goal hmangin 3-0 in hnehna an chang.

Wolves-in Raul Jimenez leh Adama Traore te goal khung hmangin Preston North End chu 2-1 in an hneh a, Hwang Hee-Chan chuan penalty a hlah thung.

Championship club tan Liverpool midfielder hlui Ben Woodburn chuan si phurh a sut ṭhen a, goal dang an neih loh avangin an tlawm ta tho.