Joan Mir a chawl rih dawn

MotoGP champion hlui Joan Mir chu Austrian Grand Prix-ah a chesual a, hliam na tak nei hran lo mah se intlansiak an neih leh hmasak tur San Marino-ah a inlan thei dawn lo, a tlan theih loh tur thu hi a team Suzuki chuan an sawi chiang tawh.

Red Bull Ring-a intlansiakah khan Mir-a'n kawngkawi hmasaah a bike a thunun thei lo, a ke rek dinglam ruh a tih nat phah a ni. A hliam hi endik a ni a, a rei lo berah ni 15 tal a chawlh a ngai dawn.

Joan Mir chuan, "Vanduai thlak takin San Marino-ah ka intlansiak ve thei dawn lo, beisei dan chuan Aragon lamah chuan ka tel leh thei tawh ang. Ka tan chuan season harsa tak chu a ni.

"Mahse, inelna hi a la tawp lo, intlansiak hnuhnung ber thlengin theih tawp ka chhuah chhunzawm ang," tiin a sawi a, season tawpah a team Suzuki-in MotoGP an chhuahsan dawn avangin a rilru pawh a nghawngin a rinawm.

Bike intlansiakna sang ber season kal laiah Mir hian chak a la nei lo, 2020 MotoGP champion hian chak a nei lo a ni satliah lo - a sang zual pathum zingah a la tel miah lo, podium a la lawn lo tihna a ni. Table-ah 12-na dinhmun a luah hram.