Match hnihnaah Srikanth a chak lo

Badminton World Championship-ah Kidambi Srikanth chu second round-ah a tla. India tlangval hian nimin tlai khan Zhao Jun Peng a hmachhawn a, hun pawimawh laia chesual zawk niin 21-9,21-17 in a chak lo.

World Championship hnuhnung berah khan Srikanth hian silver medal a la, kuminah pawh world number 1 hlui hi thlengsang leh thei tur zinga mi a ni. Mahse amah aia ranking hniam leh rinkai lo zawk lakah a zinkawng a tawp.

Srikanth a chak loh lai hian Lakshya Sen erawh a chak. India tlangval hian third round lut turin Luis Enrique Penalver chu 21-17, 21-10 in a hneh thung a, game hnih an khelh chhungin a chungnung zawkah a ṭang thei.

Women's doubles pair Ashwini Ponnappa leh N. Sikki Reddy te erawh Chen Qing Chen leh Jia Yi Fan te lakah 21-15 21-10 in an chak lo. Chinese nula pahnih hi World Championship gold medal kawl mektu an ni a, hmachhawn an awlsam lo hle.

Men’s doubles lamah erawh Indian player an chak. Seeded chang phak lo Dhruv Kapila leh M.R Arjun te chuan seeded pariatna Kim Astrup leh Anders Skaarup te ṭangdun chu 21-17, 21-16 a hnehin second round an paltlang.