Mbappe hoin kan khelh dan a danglam - Galtier

Paris Saint-Germain coach Christophe Galtier chuan Kylian Mbappe hliam a dam hnuah an team khelh dan phung an tih danglam thu a sawi. Lionel Messi, Neymar leh Mbappe te chu inngeih leh inlungrual taka an inkhelh thu a sawi bawk.

Tun hnaiah PSG hmatawng pathumte inkarah buaina a awm nia sawi a ni. Video ṭhenkhat en chuan an thu a inhmu vek lo tih pawh a hriat theih, mahse Ligue 1 match an khelh hnuhnung berah chuan an boruak a ṭha takzet.

Mbappe-a'n goal hma hruai a khung chiah chu a siamsaktu Messi a kawk a, Barcelona captain hi goal a khung theih chhan a ni tih chiang takin a lantir. Neymar pawhin goal a khung bakah assist vawi thum teh meuh a nei zui bawk.

PSG coach Galtier chuan, "Pre season match ṭhenkhatah kha chuan Kylian a inkhel ve thei lo a, season tir kan match hmasaah pawh a tel loa ruahmanna kan siam a ngai, tunah erawh a dam ṭhat tawh avangin kan khelh dan pawh kan ti danglam.

"Lille kan hneh ṭuma kan inkhel kha in en a nih chuan, tlarhma lama kan player pathum khan mahni hma an sial lo. Midang tan an khel a, ṭhiante tan remchang siamsak an tum hle tih a takin in hmu thei ang," tiin a sawi.

Paris club hian hneh-sawh takin Ligue 1 chu an awp leh dawn tih a chiang. An duh ber Champions League la tur erawhin hmasawn an la mamawh, season hmasa pawh khan rinkai ni tak chungin Real Madrid lakah an chak lo.

UCL chawi tur chuan goal khung ringawt a tawk lo, tlarhnung a phui a ngai. Tawnhriat nei ṭha Sergio Ramos a dam ṭha tawh a, Spanish defender hian hliam nei loa a khel tluang thei a nih chuan inelna lian leh boruak sangah a ṭangkai ang.