Babar Azam leh Kohli khaikhin nan a la hma - Wasim Akram

Virat Kohli-a'n kum hnih chhung chu a theihna angin a khel chhuak tawh lo a, amaherawhchu Pakistan legend Wasim Akram chuan India captain hlui hian sulhnu a neih ṭhat em avangin Pakistan captain Babar Azam nen a la hun lo, a ti.

Bowler ropui Wasim Akram chuan, "Player khaikhin hi kalphung pangngai a ni. Kan inkhelh hunlai khan Inzamam, Rahul Dravid leh Sachin Tendulkar te an khaikhin ṭhin a, kan hmalam deuhah kha chuan Sunil Gavaskar, Javed Miandad, G Vishwanath leh Zaheer Abbas te khaikhin an ni leh bawk.

"Babar hi a nghet ṭha em em a, a chhan chu technique a neih ṭhat vang a ni. A fitness a ṭha a, chet ṭhat duhin a tuihal bawk. Captain naupang tak a ni a, a inzir rang a, mahse Kohli nen khaikhin tur chuan a la hma. Chutihrualin Kohli nena khaikhin theih turin kawng dik a zawh mek," tiin Kohli dinhmun thleng pha turin Babar-a'n kawng thui tak zawh tur a neih thu a sawi chhuak.

ODI ranking thar berah India hi pathumna an ni a, Asia ramah ranking a ṭha ber. Pakistan hi ranking-ah palina niin India hnuai chiaha an awm avangin an intumtawk dawn tih a chiang. Chutihrualin Pakistan hian an bowler pawimawh Shaheen Afridi chu khup hliam vangin a khel thei dawn lo a, Shaheens tan channa nasa tak a ni ang.

August 27, Inrinni hian Asia Cup khelh ṭan a ni dawn a, August 28, Pathianni hian ram inhal India leh Pakistan te an inhmachhawn dawn. Men in Blue leh Shaheens inkhel tur hian sawi a hlawh ṭan hle.

Asia Cup Fixtures
Group A: India, Pakistan, Qualifier*
Group B: Afghanistan, Bangladesh, Sri Lanka

August 27, Inrinni
Sri Lanka 7:30 PM Afghanistan
August 28, Pathianni
India 7:30 PM Pakistan
August 30, Thawhlehni
Bangladesh 7:30 PM Afghanistan
August 31, Nilaini
India 7:30 PM Qualifier*

*Qualifier hi Oman-ah khelh a ni a, team pali United Arab Emirates, Hong Kong, Kuwait leh Singapore te an tel. Nizan dar 9:30 hian point li hmu tawh Hong Kong (4 pts) leh UAE (2 pts) te an inkhel a, a chak zawk tan tlin theih ve ve a ni.

Chutihrualin Kuwait-in (2 pts) Singapore (0 pt) an hneh chuan tlin theih dan an la nei ve bawk. Match hmasa pahniha point hmu lo Singapore tan erawh beisei tur a awm tawh lo.