AFC-in ISL a pawm ta
Asia khawmualpuia football thuneitu sang ber Asian Football Confederation (AFC) chuan Indian Super League an pawmpui thu an puang ta.
ISL hi season thum khelh a nih chhung khan AFC hriatpui loh tournament 'pakhat' ang chauhah ngaih a ni a, tunah chuan official league a ni ta, tihna a ni.
AFC berin ISL an pawmpui takah chuan tun season aṭanga club 10 inelna tur hi FIFA hriatpui inelna a ni tawh dawn a, November 17 aṭanga khelh ṭan niin thla ruk emaw thla sarih khelh turin ruahmanna siam a ni - I League nen a ruala khelh an ni tawh dawn.
Thutlukna chu
All India Football Federation chuan ISL hi FIFA hriatpuina hnuaia inelna a nih theih nan hun rei tak chhung hma an lo la tawh, commercial leh marketing lama an thawhpui IMG-Reliance hotute nen AFC general secretary Dato Windsor leh AFC - UEFA Affairs head Alex Philips-te chu May thla khan inbiakna an lo neihpui tawh.
AFC leh Indian football-a mi pawimawhte chu June 7 khan Kuala Lumpur-ah an lo indawr tawh bawk a, thutlukna an siam thei chuang lo. Mahse, tunah erawh AFC-in thutlukna an nei ta a, ISL champion-in AFC Cup playoff an khel ang a, I League champion-in AFC Champions League playoff an khel thung ang.
AFC thuchhuah
AFC chuan, "All India Football Federation ngenna chu uluk taka ngaihtuah a nih hnuin AFC Competitions Committee chuan I League nena a ruala kal tur Indian Super League chu hriatthiamna sang tak nen a hma hun tur a ngaihtuah a, 2017-18 a thla ruk emaw thla sarih khelh tur inelna hi 'tun atan' chuan pawm rih phawt a ti tlu a ni," an ti a; I League champion-in AFC Champions League playoff an khelh tur thu leh ISL champion-in AFC Cup preliminary stage an khelh tur thu an puang.
AFC thuchhuah aṭanga a lan dan chuan India ramah league pahnih a kal reng dawn lo. Tuna AFC-in ISL a pawmna hi chu 'tun hun' atan chauh a ni a, season khat a liam hnuah chuan AIFF hi league pakhat nei turin Asia rama football thuneitu sang ber hian an beisei tawh ang.
Engtin nge Super Cup?
AIFF hian a tirah Asia football inelnaa hmun thum lai neih hi AFC hnenah an dil.
Ruahmanna ang chuan I League leh ISL-a palina ve ve chin club pariat chu Super Cup-ah an intawng leh ang a, champion-in AFC Champions League playoff khelin I League leh ISL champion-ten AFC Cup playoff an khel ang.
Mahse, AFC chuan he ruahmanna hi a pawm lo a, tuna buaina awm ta chu fan-te nghahhlelh Super Cup hi khelh a ni kher ang em? tih hi a ni.
Vanglaini thu dawn danin league pahniha top four-te inelna tur hi kaltlangpui rtum zel a la ni a; nimahsela kaltlangpui a nih pawhin ISL hmasa anga tournament pakhat anga khelh a ni ang - Federation Cup erawh tun season-ah a awm lo ang.
Aizawl FC hma hun?
Mizo club-in season hman zawh takah I League nomawi an chawi a, 'Asia-ah an inlan dawn em?' tih zawhna tam tak a awm.
Tuna AFC thuchhuah hi season thar aṭanga hman chauh tur a nih dawn avangin Mizo club hian AFC Champions League an khel ngei dawn a, preliminary stage aṭanga bul ṭanin group stage an inhlangkai zo lo a nih chuan AFC Cup an khel leh tho ang.
Federation Cup champion Bengaluru pawhin season thar atan India aiawhin AFC Cup an la khel dawn tho. A awmzia takah chuan season thar aṭang chuan Fed Cup champion 'hmun' ṭhin kha ISL-in an hauh tawh dawn tihna a ni.