La Liga season a tawp ta Tlai lam um pawng par Barcelona

Covid-19 vanga La Liga season khelh zawh theih a nih dawn leh dawn loh kan hriat loh lai kha hmanni lawk a ni - mahse, Pathianni zan khan Spanish top flight football chu tun season atan khelh zawh a ni ta a, engkim tihchian a ni ta. 

Pathianni zana La Liga match khelh a nih hma hian Real Madrid chu an champion chiang hman tawh a, season thara Champions League khel tur Real, Barcelona, Atletico Madrid leh Valencia pawh a chiang hman vek tawh. 

Hetihrual hian Pathianni zan hmaa la chiang lo zingah Villarreal hnungzuiin Real Sociedad leh Granada chu Europa League khel turin an tling chiang a, Celta Vigo an him ta bawk. Celta an him laiin champion Real Madrid inhnehtawkpuitu Leganes erawh division hniam lamah an tla thung a, Mallorca leh Espanyol te nen season tharah chuan second division an khel ang. 

Barcelona-in an league match tawp berah Alaves chu 5-0 ngawtin an sawp a, mahse Real an champion chian tawh tho avangin Catalan club chakna hian awmzia a nei tawh lo. Thil danglam ve tak erawh Barca hian substitute bench-ah player 12 a awm theih chungin panga chiah an nei!

Rawlthar duhawm Ansu Fati chuan minute 24-na lekah goal hmahruai a khung a, kum 17 mi forward hian La Liga-a a season hmasa berah match 24 khelin goal sarih a khung nghal - hma hun a nei êng hle. Barca tan hian an thiampuipa Lionel Messi chuan first half leh second half-ah goal khat ve ve khungin goal hnih a khung bawk a, Luis Suarez leh Nelson Semedo ten goal khat ve ve an thawh. 

Alaves khelmualah Barca hian an thinrimna an hri thla a ni ber a, Fati-a'n goal hmahruai a khung hma hian Riqui Puig, Messi leh Arturo Vidal-te chuan woodwork an tih per vek - a tawpah Barca chiang takin an chak a, awmzia erawh a nei thui ta lo. 

Real chelhtu Leganes an liam 

Champion lai Real Madrid-in tlak hlau Leganes mualah hnehna an chang zo lo a, 2-2 in an inhnehtawk. Celta Vigo-in 0-0 a Espanyol an inhnehtawkpui avangin Leganes tan champion team draw erawh a tawk zo lo a, division hniam lamah an tla. 

Real tan hian defender Sergio Ramos chuan tun season inelna hrang hranga a goal 13-na a khung a, La Liga bika a goal 12-na a ni - striker vantlangin season khata an goal khung zat zet defender nichungin a khung a, a namai lo hle. 

Leganes tan Bryan Gil chuan first half hun pek belhah si phurh a rawn sut a,  Marco Asensio chuan minute 52-naah Real hi hma a hruai nawn pui. Mahse, an nunna atana beitu Leganes an beidawng duh lo. Roger Assale chuan minute 78-naah si phurh a rawn sut leh a, La Liga-a inhamtang tur erawhin chak an mamawh - mahse hun pek belh minute ruknaah Real Madrid aṭanga loan hmanga Leganes tana khel Oscar Rodriguez chuan a hun ṭha neih a pet over a, Leganes an tla.