VAR ṭantu Maradona

Diego Maradona chuan video assistant referees (VAR) hman ṭha a ti a, chutihrualin kum 1986 khan VAR hi hman ni tawh se chuan football legend goal hriat hlawh 'hand of god' kha pawm a ni lo ang.

Kum 56 mi Maradona chuan, "VAR hman chung­­chang ka thlawp apiangin ka goal khung kha ka hre chhuak ṭhin a, tun lai thiamna hi hman tawh ni se chuan pawm a ni lo ang," tiin tun hmaa thiamna la sang tawk lo chu a vanneih pui tih a pawm.

Hand of god in sawi a hlawh a, hemi ṭumah lo pawh hian Maradona-a'n a kut a hmang ṭangkai. Argentine legend chuan, "Thil dang kan hrilh ang che u. 1990 World Cup khan Soviet Union nen group stage-a kan inhmachhawn ṭumin ka kut hmangin kan lama goal tur ka beng chhuak. Referee min hmuh loh avangin kan vannei a, khatihlai kha chuan VAR hman tur a la awm lo. Tunah erawh thawnthu dang ziah a hun ta," tiin VAR a ṭan thu a sawi.

England chungchang sawi langin Maradona, "England-in goal line pel lo, goal-a pawm sak an nih vangin 1996 World Cup-ah an champion. Tun hma khan thiamna sang chu hman ni se World Cup chanchin tam tak her danglam a ni ang. Tunah chuan a ven theih tawh a, a thlen nawn a rem tawh lo," tiin a ṭanchhan a sawi chiang.

FIFA chuan nakkuma Russia-in World Cup a thlen huna hman theih turin inelna hrang hrangah VAR hi a enchhin a, he dan hmang hian goal, penalty thutlukna, direct red card leh player hai vanga thutlukna dik lo chu siam ṭhat theih a ni. Kumina Germany champion-na Confederations Cup-ah pawh khan VAR hi hman a ni a, ṭhatna lai tam tak awm mah se sawiselna aṭangin a la fihlim lo.