AIFF MC thar Asawma

India rama football thu­neitu sang ber All India Football Fede­ra­­tion hnuai­a inelnaa Match Com­­missioner ni thei turin Mizo tlangval R. ­Mal­sawma (Asawma) chu a inziak tling.

Chanmari tlangval Asawma hi Mizo zinga MC zir chhuak thei pa­hnihna a ni a, MC ni thei hmasa ber Lalrawngbawla, Bungkawn chuan Cuttack-ah National Junior Girls Football Championship a kaihruai mek.

AIFF hian ni thum chhung awh MC seminar chu Mumbai leh Kolkata-ah an buatsaih a, mi 50 inlan zingah 24-in hlawhtlinna an chang a, panga chu pro pass niin mi 21 an fail.

Asawma hian East Bengal Tent, Kolkata-ah July 11-13 chhung khan training a nei a, July 14 khan exam a hmachhawn leh bawk. Chanmari tlangval chuan, "A sang thei ang ber thlen tumin theihtawp ka chhuah ang. Mizote hian football-ah hian player chauh ni loin coach te, match commissioner te, national referee leh football agent te hi luhchilh ngam ila, tih hi ka duhthusam a ni," tiin Vanglaini a hrilh.

Match commissioner ni tur hian kum 30 chin tal nih a ngai a, Asawma hi kum 30 chauha upa a nih avangin MC ni thei naupang ber zinga mi a ni.