Kan la bazar zo lo - Pep Guardiola

Tun nipui transfer chhungin Man­chester City chuan pound maktaduai 200 an hmang tling tawh a, manager Pep Guardiola chuan player thar an la melh reng thu a sawi chhuak.

Man City hian Benjamin Mendy, Bernardo Silva, Kyle Walker, Ederson, Danilo leh Douglas Luiz te Etihad Stadium-a lalut turin pound maktaduai 200 chuang an seng tawh. Silva leh Luiz te tih loh hi chu tlarhnung lam pui tur vek an ni a, goal khung tur an la melh nia ngaih a ni.

Barcelona manager hlui Pep chuan, "Transfer bazar hi August 31-ah a tawp dawn a, Premier League ṭan hun chu August 12 a ni. Bazar tawp hun leh league ṭan hun inhnaihchilh lutuk hi chu club zawng zawng tan a ṭha lo ka ti, duhthusamin kan inpeih ṭhin lo," tiin a sawi.

City hian an player neihsa Pablo Zabaleta, Gael Clichy, Bacary Sagna leh Aleksandar Kolarov te an chhuahtir a, an aiawh turin Mendy, Danilo and Kyle Walker te an lalut tawh.

Kum 46 mi Guardiola chuan, "City hian tun hnai kum sarih chhung vel chu tlarhnung thuam chak turin sum an seng hnem ngai lo, player tam zawk kha kum 30 chuang an ni tawh a, tunah chuan phui zawka inrem tur chuan insiamṭhat kan ngai nasa a ni," a ti.

Tlarhma lam sawi chhunzawmin Guardiola chuan, "Tunah hian Gabriel Jesus leh Sergio Aguero te kan nei mek a, an ṭha tawk hle. Chutih rualin duhtawk a awm thei lo ang, eng nge lo thleng dawn chu kan hria ang chu," a ti. Pep hian City nena sawi zawm mek Alexis Sanchez leh Mbappe te chu Arsenal leh AS Monaco tan a nih thu a sawi tel bawk.

City hi season thar inbuatsaih nan United States lamah an zin mek a, tukin dar 8:30 hian La Liga leh Champions League nomawi kawl kawptu Real Madrid nen an inhmachhawn dawn.