Sum hman dan uchuak sawiseltu Levy

Tottenham Hotspur chairman Daniel Levy chuan tun nipuia Premier League club hman dan chu kenkawh reng theih a nih loh thu a sawi a, tuna club tam tak sum sen dan chu hun rei zawk thlirin ṭha a tih loh thu a sawi tel bawk.

Spurs hian player lakluh an la nei lo a, Kyle Walker chu an hmelma Manchester City lamah an kaltir thung. Pep Guardiola hote hian pound maktaduai 200 chuang an hmang tawh a, Chelsea leh Manchester United te pawh transfer-ah thawm an nei lian a, striker ṭha Alvaro Morata leh Romelu Lukaku te an lalut tawh.

Tottenham chairman Levy chuan, "Nipui bazara player lakluh dan hi ka hmuh dan chuan kenkawh reng theih a ni lo. Hei hi Premier League club dang ngaihdan a ni em tih erawh ka hre lo a, amaherawhchu Premier League club ṭhenkhat player lak dan hi chu a uchuak a ni. Club kan enkawl ṭheuh a, awmze neia enkawl hi kan hna a ni," tiin club dang a sel.

Kum 55 mi Levy chuan sawi chhunzawmin, "Kei chuan he football club vengtuah ka inngai a, Spurs hi kum 1882 khan din ṭan a ni tawh a, midang kuta dah hun pawh a la awm ang. Kan sum lakluh aia tam sen hi ṭha ka ti lo a, hun engemaw tichhung chu a tih theih ang a, hun rei atan erawh a tlak loh," tiin a sawi. Tottenham hian Walker, Nabil Bentaleb, Clinton N'Jie leh Federico Fazio te an hralhna aṭangin pound maktaduai 75 bawr vel an lalut tawh a, amaherawhchu tuna an ngaih pawimawh ber chu stadium thar a ni.

Spurs chairman chuan, "Stadium kan sa ṭha mek a, kan tan chuan hei hi a pawimawh hmasa ber a ni. Stadium ṭha kan neih chuan fan tam zawk kan nei ang a, sum tam zawk kan hui lut ang a, awmze neiin club kan kalpui tihna a ni ang. Academy hi a pawimawh bawk a, player ṭha kan chherchhuah chuan player lei nan £20, £30m, £40m chho hi kan sen a ṭul lo. Mipui pawhin keimahni chhuak ngei player hi an lawm a, Spurs ṭantute hian Harry Kane hi an hmangaih a ni," tiin club lian el pha tura an indinchhoh mek thu a sawi.

Tottenham hian Thawh­lehni khan friendly match-ah Roma 2-3 in an hneh lo a, hemi ṭum hian academy pla­yer pathum Cameron Carter-Vickers, Kyle Wal­ker-Peters leh Josh Onomah ten bul an ṭan. Kar liam ta khan French champion Paris St-Germain 4-2 in an hneh a, kum 17 mi midfielder Tashan Oakley-Boothe chuan minute 45 chhung a khel bawk. Spurs hian player lakluh la nei lo mah se an neihsa player an ṭha a, an academy player-te'n beisei an phak chuan Champions League khelh chauh ni loin league nomawi beisei pha tur club an ni.