Bagan-ah Uttam Rai a lut

Mohun Bagan-in transfer bazar-ah players an duhtawk mai lo. Indian rawlthar duhawm Uttam Rai an lak belh leh ta - Kolkata club hian ISL draft neih zawh a nih hnuah players pariat ngawt an lalut tawh.

Sikkimese rawlthar hian season hmasa I League kha Minerva Punjab-ah a hun a hmang a, match li bak a inlan lo. Kum 2016 Indian Super League-ah khan Chen­naiyin FC tan a khel a, match khat bak a inlan lo.

Kum 20-a upa for­ward hian 2012 AFC U16 Championship qualification-ah khan India U16 tan match liah goal ruk ngawt a khung a, heta ṭang hian Indian football ngainatute ngaihven a hlawh ṭan. Kum 2012 Dallas Cup-ah India junior team tan a inlan a, he inelnaa player thlir tur bik 10 thlanchhuah zingah a tel phak hial a ni.

IMG Soccer Aca­demy, Florida aṭanga in­zir­­chhuak Uttam hi a kum la tam lo mah se tawnhriat erawh a nei tlem lo hle. Kum 2014-16 chhung khan Dempo SC tan a khel a, ram tan age level U14, U16 leh U19-ah a inlan vek tawh bawk.