Sum vangin Chinese Super League an buai
Chinese Super League club 16 zinga 13-te chu Chinese Football Association chuan player-te hlawh a hun taka pe loah an puh a, an insawifiahna Chinese FA hnena thlen vat turin an hriattir. Chinese FA chuan CSL club 13 bakah hian League One club pali leh League Two club pakhat chu hlawh pe ṭha lo club zingah hian an tarlang bawk.
CFA chuan club 18-te hi player transfer-na, hlawh leh bonus pek tura an intiam ang pe loah an puh a, club-te hian an sum bat hi an pe tla vat a nih loh chuan inelna hmachhawn thei lo tur hiala hremah CFA chuan a vau.
Buaina chu
Asia rama football thuneitu sang ber Asian Football Confederation (AFC) chuan July 11 khan Chinese FA hnenah lehkha an thawn a, Chinese club-ten player-te hlawh an pek ṭhat tawk loh thu an hrilh. AFC chuan club-te hian August 31 thleng player-te hlawh tihfelna hun atan an neih thu leh hemi hmaa an tifel hman a nih loh chuan Asian Champions League khelh ve phalsak an nih loh tur thu CFA hi an hrilh.
CFA-in hma an la nghal a, player-te hlawh pe ṭha lo club 18 hnenah lehkha an thawn. Chinese FA chuan club-te hi August 15 hmaa players hlawh an bat zawng zawng pe tla vek turin a hriattir a, an pe ngei a ni tih finfiahna CFA hnena thawn turin an ti bawk. Thupek anga ti thei lo club-te chu inelna
aṭanga petchhuah an ni ang.
Club insawifiahna
CSL club players hlawh pe ṭha loa puh zinga tam zawkin puh an nihna an pha a, heng zingah hian January-a pound maktaduai 60-a Chelsea
aṭanga Oscar laluttu Shanghai SIPG an tel. Shanghai club chuan nikum October-ah khan players hlawh an batte chu an pek tlak vek tawh thu an sawi a, CFA hnenah players hlawh an pe ngei a ni, tih tihchianna an thawn thu an sawi bawk.
Club langsar tak tak Jiangsu Suning, Shandong Luneng leh Beijing Guoan-te pawhin thuchhuah siamin player-te hlawh an pek ṭhat thu an puang a, Carlos Tevez-a khelhna Shanghai Shenhua chuan an lehkha dawn chu an zirchian mek thu leh player-te hlawh a rang lama an pek tlak tur thu an sawi.
Engtinnge player langsar?
Europe-a player langsar tak takin sum tam zawk hlawh turin CSL lam an pan a, tun hnaiah hetiang thuthar a awm takah chuan anni ho hian an hlawh an dawng ṭha em? tih hi football ngainatuteah zawhna a awm nghal - a chhanna chu "anni chuan an la ṭha e," tih hi a ni.
Tevez-a khelhna Shanghai Shenhua pawh thubuai nei zingah tel mah se kar khata £615,000 hlawhtu Argentine striker hlawh erawh bat an nei lo. Chelsea player hlui pathum Ricardo Carvalho, Ramires leh Oscar-te khelhna chu thubuai nei zingah tel mah se player pathum ten hlawh lak loh an la nei lo a, Oscar nena khelhna inang Hulk pawh hlawh bat sak zingah a tel lo - a tawi zawnga sawi chuan player langsar chinin hlawh lak loh an la nei ve lo.
Invenna Chu
Chinese Football Association chuan tuna buaina hi thil thleng thei a ni tih hriain Chinese club-ten sum uchuak taka an sen ṭhin chu veng turin nasa takin hma an lo la tawh. January khan March aṭanga inṭan tur Chinese football thlir lawkin first eleven-a foreign player tel thei zat chu pathumah an lo tihniam tawh a, he dan hman a nih hma chuan foreign player pali bakah Asian player pakhat chu starting XI-ah an awm thei.
Hei mai hi a ni lo. Chinese club-te chu player, pound maktaduai nga man chunglam chin an lak reng rengin 100% chhiah chawi turin an ti bawk! Hemi awmzia chu club-in player pound maktaduai nga man an lak chuan heti zat vek hi chhiahah an chawi a ngai dawn tihna a ni a, an sum chawi hi sorkar enkawl football hmasawnna tura hmalaknaah thehluh a ni ang.