Nipui transfer tingaihnawmtu ; Neymar, Mbappe, Coutinho leh Renato

Tun nipui transfer tawp hma ngeiin transfer lian tham hmuh tur a awm dawn niin a lang. Barcelona forward Ney­mar, Monaco forward Kylian Mbappe, Liverpool midfielder Philippe Coutinho leh Bayern Munich midfielder Renato Sanches te chanchin chu khawtlang media-te chaw tui a ni mek.

Neymar a nghet?

Barcelona forward Neymar chuan Catalan club a chhuahsan dawn lo - hei hi a dik a nih loh pawhin a khelhpui Gerard Pique hriatthiam dan a ni.

Brazil captain Neymar hi Paris St Germain chuan a leichhuah theihna zat pound maktaduai 199-in an ngam niin sawi a awm a, thuthang satliah a ni lo. Chutichung chuan Pique chuan, "Amah nena kan inbiakna aṭanga ka hriatthiam dan chuan a chhuak lo ang. Chhuak lo turin ka duh bawk," tiin a sawi. Neymar hian Inrinnia Juventus 2-1 a an hneh ṭumin goal hnih a khung.

Record siamtu Real!

Real Madrid hian khawvel player manto ber an kawl fo a; Luis Figo, Zinedine Zidane, Kaka, Cristiano Ronaldo leh Gareth Bale te chu an hunlaia player manto ber vek an ni.

Spanish chanchinbu Marca chuan Real hian kum 18 mi Kylian Mbappe lalut turin euro maktaduai 180-in Monaco nen an inrem tih an ziak a, French club hian he thu hi pha mah se thuthang leng vak satliah a ni tawh lo.

French striker Mbappe hian kum ruk daih contract a ziak ang a, kum khatah euro maktaduai sarih hlawh tura ziah a ni. Amaherawhchu thuchiang a la awm thei lo - pound maktaduai 200 chuang hmang tawh Manchester City-in Mbappe lakluh an la inbeisei reng tih a awm bawk.

Barca lamah Coutinho?

Barcelona-in Neymar chelh theih nan a ṭhianpa Philippe Coutinho chu Liverpool aṭanga lakluh an tum a, Catalan club hian Brazil captain hi an chan a nih pawhin Coutinho hi a thlak nan an duh cheu tiin sawi a awm.

Brazilian midfielder Cou­tinho leh Catalan club hi an inrem tawh niin thuthang a awm a, belhchian erawh a la dawl lo. Reds boss Jurgen Klopp chuan Germany-a Hertha Berlin hmachhawn tur zingah Coutinho hi a telh a, RB Leipzig midfielder Naby Keita lakluh theih a la beisei bawk.

Bayern chhuahsan tur Renato

Euro 2016-a Portugal cham­­pion-na kawnga player pawimawh Renato Sanchez chuan Bayern Munich-ah hmun pawimawh a chang pha lo a, kum 19 mi midfielder hi German club chhuahsan tura ngaih a ni.

Portuguese midfielder Renato hi pound maktaduai 43 man tura ngaih a ni a, AC Milan leh Manchester United te chu lalut tura sawi rik an ni.