Hmasawn mamawh Indian nula

Sania Mirza chuan Indian nulate chuan tennis huangah hmasawn an ngaih thu a sawi a, hetih lai hian Karman Kaur Thandi leh Prarthana Thombare te pawhin an thlenchin aṭangin dinhmun sang zawk an luah theih a duhsak thu a sawi tel bawk.

Hmeichhe doubles world number 1 hlui Mir­za chuan, "Beisei kan nei thiang a, chumi tihlawhtling tur chuan kan thawkrim tur a ni. Tuna kan thlen chin hi a la sang tawk lo a, ram dang dinhmun elphak turin hmasawn kan ngai takzet," a ti.

India nula zingah tun dinhmunah chuan kum 19 mi Kaur hi hmabak nei êng pawl tak a ni phak a, world ranking-ah 531-na a nei mek. Ani bakah hian Thombare hian a tawn san lai berin number 335 a ni ve tawh. Tennis inelna ngaihhlut Grand Slam singles qualifying khel phak tur pawhin number 200 chin tal an nih a ngai.

Kum 30 mi Mirza chuan sawi zawmin, "Hma­sawnna hi a zuanin a zuan a ngai, mipa aiin hmeichhia kan hnufual zawk a, kan inenfiah a ngai hle. Theihna neih san a pawimawh a, chumi rual chiah chuan tawrh­chhelna leh finna a pawimawh bawk," tiin a sawi.

Hyderabad nula Mir­za hi a vanglai chuan singles-ah world number 27 te pawh a ni phak ṭhin. Grand Slam paliah a inlan kim vek a, kum 2005 khan US Open fourth round a inhlangkai ve hial a ni. Hmeichhe doubles lamah chuan French Open tiam lohin major title a la kim tawh.