Morata khelh danah Conte a lawm

Chelsea striker thar Alvaro Morata chuan Thawhlehni zan khan a club thar tana a match hmasa ber a khel a, goal khung lo mah se Blues manager Antonio Conte chu a player thar khelh danah a lungawi hle.

Premier League cham­pion hian season thar inbuatsaih nan German champion Bayern Munich an hmachhawn a, Conte naute hian goal thum an chhuah hnuah goal hnih khung let ve mah se 3-2 in an chak lo.

Real Madrid striker hlui Morata chu minute 64-naah luhtir a ni a, tlarhma lama a tlan pui Michy Batshuayi goal khung tur a siamsak. Blues goal pakhat zawk hi defender Marcos Alonso khung a ni thung.

Blues manager Conte chuan, "Alvaro hi kan hnenah a rawn kalna ala rei lo a, a thiamna tak pholang tur leh a ke nghahchhan siamrem tur chuan hun a mamawh dawn tih chu thil chiang sa a ni. Chutihrualin Bayern lakah minute 27 vel chauh a khelh chhung khan a chet danah lawmna tur tam tak a awm," tiin a striker thar a fak hle.

London club hian pre season tour an hmang chhe lo. An match hmasa pahnihah Fulham leh Arse­nal an hneh tawh a, Bayern chiah ngam loh an la nei. Inrinni tlai dar 5:00-ah Italian club Inter Milan nen National Stadium, Singapore-ah an inkhel leh dawn a ni.

Carlo Ancelotti en­kawl Bayern Munich hi Arsenal hneh lotu an ni thung a, Blues an hmachhawn ṭum pawh hian Manuel Neuer, Jerome Boateng, Arturo Vidal, Thiago Alcantara leh Arjen Robben te an la chhawr theih loh avangin rinkai zawk an ni lo.

Amaherawhchu, kee­per Neuer a awm loh avanga captain dinhmun luahtu Thomas Muller-a'n goal hnih a khung bakah midfielder Rafinha chuan goal khat a khung thung. Dinhmun chiang loa an sawi midfielder Renato Sanches-a'n minute 90 a khel tluan a, Blues midfielder Cesc Fabregas leh N'Go­lo Kante te lakah a theihna san zia a pholang bawk. Bayern hian zanin dar 7:05 hian Inter Milan nen an inkhel zui leh nghal ang.

Inlan te

CHELSEA (3-4-3) : Courtois (Eduardo 76); Azpilicueta, Chris­tensen (Luiz 64), Cahill; Moses, Kante, Fabregas (Pasilic 86), Alonso (Tomori 76); Willian, Batshuayi (Baker 86), Boga (Morata 64).

BAYERN (4-2-3-1): Starke (Fruchtl 46); Ra­finha (Gotze 64,), Mar­tinez, Hummels, Friedl; To­lisso (Pantovic 64), Sanches; Muller (Wint­zheimer 80), James, Ribery (Dorsch 80); Lewan­dowski (Coman 46).