Europe-a inlan tur Granada

Spanish club vantlang Granda-in season thara European football khel turin Athletic Bilbao chu 4-0 in an sawp a, an club chanchina a vawi khat nan Europe-ah an inlan dawn!

Granada tan hian striker tawnhriat nei ngah Roberto Soldado chuan goal hmahruai a khung a, kum 35 mi striker-in tun season inelna hrang hranga goal 11-a khungna chiah a ni. Soldado goal khung hnuah  Antonio Puertas, Carlos Fernandez leh Angel Montoro te chuan goal khat ṭheuh an khung bawk a, season tharah second qualifying round aṭanga inlanin Europa League an khel ang. 

Covid-19 vanga chawlh laia Champions League sawi ri hman Real Sociedad-in Europa League-ah an hlimna an hmu a, khualmualah 1-1 a Atletico Madrid inhnehtawkpuiin season tharah Europa League chu group stage aṭangin an khel ang. Sociedad hian inkhelh hmain European football khel turin point khat chauh an mamawh a, mahse Atletico tan Álvaro Morata-a backheel mawi zet chu Koke chuan goal hmahruai a tan a khung. Mahse, Sociedad tan kum 25 mi Adnan Januzaj chuan minute 87-naah si phurh a rawn sut a, an mamawh point khat hlawh chhuakin Europa League an khel dawn.