Vawiin I Day Football ṭan hun ; Aizawl FC Vs Bethlehem Vengthlang
Great Sports Independence Day Cup 2017 chu vawiin hian Rajiv Gandhi Stadium-ah khelh ṭan a ni dawn.
Chawhnu 1:00-ah champion lai Aizawl FC leh Bethlehem Vengthlang FC an inhmachhawn ang a, dar 3:15-ah nikum finalist Ramhlun North FC leh Dinthar FC ten an khel ve leh ang.
Inelna chu
Independence Day puala inelnaah hian Mizoram Premier League club pariat bakah state pawn aṭanga sawm AIFF Under 19 leh Rhino Charge te an inel dawn.
Nikum khan Shillong Lajong leh AIFF Under 19 te an rawn tel a, AIFF Under 19-in group stage an paltlang thei lo a, semifinal-ah I League club Lajong an tla bawk.
Kuminah hian Group A-ah Aizawl FC, Bethlehem Vengthlang FC, Dinthar FC, Ramhlun North FC leh AIFF Under 19 te an awm a, Group B-ah Chanmari FC, Mizoram Police FC, Chhinga Veng FC, Chanmari West FC leh Rhino Charge te an awm thung.
Group khat aṭangin team pahnihin knockout stage an lut dawn. Semifinalist pahnihin Rs 10,000 an dawng dawn a, champion-in Rs 1,00,000 an dawng ang a, pahnihnain Rs 50,000 an hawn bawk ang. Inkhelh apiangin a chak zawkin Rs 3,000 dawngin a chak loin Rs 2,000 an dawng ang a, an inhnehtawk a nih chuan Rs 2,000 ve ve an dawng thung ang.
Thlirlawkna
I League champion AFC hian MFA Super Cup Last 16-ah Mizoram Police an hneh lo a, hemi ṭum hian Kareem Omolaja Nurain a vawi khat nan a inlan a, Nigerian defender hi a fitness a ṭhat tawk loh avangin Aizawl FC a chhanhim zo lo.
Vawiin hi Kareem-a tan inlan vawi hnihna a ni tawh dawn a, tlarhnunga a dinpui tur Lalhriatrenga leh Lalramhmunmawia te an dam tawh avangin mualpho nawn lo tura ngaih a ni. AFC-in hnehna an chan theih nan captain Alfred Kemah Jaryan-a a ṭan lehzual a ṭul a, I League-a best midfielder ni thei player hi MFA Super Cup-ah player naran a ni.
AFC-in theihna nei sang David Lalrinmuana, Lalruatfela Zote, H. Lalmuankima, Albert Zohmingmawia leh William Lalnunfela te an kawl a, MFA Super Cup-ah mualpho tawh mah se I League club hian I Day Football nomawi an humhim turin theihna an nei.
Bethlehem Vengthlangin MFA Super Cup-a champion zui ta Chhinga Veng FC chu last 16-ah goal khat chauh chhuahin an hneh lo a, an mamawh chu goal khungtu a ni.
BVT coach Chawnga chuan training-naah goal khung chu an zir nasat ber a nih thu a sawi a, tlarhma lama awm B. Zoramthara, Edenthar-a leh captain Lalrammawia te a hrual nat thu a sawi lang bawk.
Kan ṭha zawk
Aizawl FC coach Rohmingthanga leh Bethlehem VT coach Chawnga ten 'Kan ṭha zawkin kan hria' tiin Vanglaini an hrilh ve ve a, khelmual chhungah a ṭha zawk zawnna a awm ang.
AFC coach Rohminga chuan, "Training kan nei ṭha thei a, MFA Super Cup ai kha chuan kan ṭha tawh zawk turah chuan ka ngai. Chak ngei tumin theihtawp kan chhuah dawn a, team ṭha zawkah ka inngai bawk. Hnehna chang turin supporter neih ṭhat a pawimawh dawn a, I League laia min ṭantute ṭhenkhat ten club dang an ṭan a ṭul tawh a, chuvangin kan 'fan club' lam pawh an ṭan a ṭul a ni," tiin Vanglaini a hrilh.
Lengpui tlangval Rohminga hi I League-a Mizo club champion puitu Khalid Jamil-a thlak lailawktu a ni a, Aizawl FC hian Khalid-a thlakna turin foreign coach an be fel hnai a, state pawn lama khel player langsar tak an lalut dawn bawk.
BVT coach Chawngthansanga chuan, "MFA Super Cup-ah kan fitness a ṭha tawk lo a, hemi vang hian tihsual kan ngah phah a, minute 90 chhung kan ṭang thei lo. Tunah chuan kan ṭhat theih dan ber la thleng lo mah ila nasa takin hma kan sawn tawh. Aizawl FC-in an player ṭhahnem tak an chan a, chutichung chuan MPL-ah chuan a sang pali zingah an awm phaah ka ngai a, chuhtihrualin tun dinhmunah erawh anni aia ṭha zawkah ka indah," tiin I League club hlauhna a neih loh thu a sawi.
Fixtures
Group A - Aizawl FC, Bethlehem Vengthlang FC, Dinthar FC, Ramhlun North FC, AIFF Under 19
Vawiin inkhel tur - Rajiv Gandhi Stadium
01:00 PM Aizawl FC vs Bethlehem Vengthlang FC
03:15 PM Dinthar FC vs Ramhlun North FC
July 31, Thawhṭanni - Lammual
12:15 PM Bethlehem Vengthlang FC vs Dinthar FC
02:30 PM AIFF Under 19 vs Aizawl FC
August 2, Nilaini - Lammual
12:15 PM AIFF Under 19 vs Ramhlun North FC
02:30 PM Dinthar FC vs Aizawl FC
August 4, Zirtawpni - Lammual
12:15 PM Aizawl FC vs Ramhlun North FC
02:30 PM Bethlehem Vengthlang FC vs AIFF Under 19
August 7, Thawhṭanni - Lammual
12:15 PM Dinthar FC vs AIFF Under 19
02:30 PM Ramhlun North FC vs Bethlehem Vengthlang FC
Group B- Chanmari FC, Mizoram Police FC, Chhinga Veng FC, Chanmari West FC, Rhino Charge
July 29, Inrinni - Rajiv Gandhi Stadium
01:00 PM Chanmari FC vs Mizoram Police FC
03:15 PM Chhinga Veng FC vs Chanmari West FC
August 1, Thawhlehni - Lammual
12:15 PM Mizoram Police FC vs Chhinga Veng FC
02:30 PM Rhino Charge vs Chanmari FC
August 3, Ningani - Lammual
12:15 PM Rhino Charge vs Chanmari West FC
02:30 PM Chhinga Veng FC vs Chanmari FC
August 5, Inrinni - Lammual
12:15 PM Chanmari FC vs Chanmari West FC
02:30 PM Mizoram Police FC vs Rhino Charge
August 8, Thawhlehni - Lammual
12:15 PM Chhinga Veng FC vs Rhino Charge
02:30 PM Chanmari West FC vs Mizoram Police FC
Semi Finals
August 10, Ningani - Lammual
02:30 PM Winner of Group A vs Runner Up of Group B
August 11, Zirtawpni - Lammual
02:30 PM Winner of Group B vs Runner Up of Group A
Final
August 15, Thawhlehni - Lammual
03:00 PM Winner of SF1 vs Winner of SF2