Man United ngam loh Neymar

Jose Mourinho kaih­hruaina hnuaia khel Man­chester United chu nimin zing khan Barcelona lakah si khat faiin an tlawm. Catalan club tan hian tun nipui transfer chhunga thawm nei lian tak Neymar chuan goal awmchhun a khung.

Washington-a Interna­tional Champions Cup khelhah Lionel Messi-a through ball chu United defender Antonio Valen­cia-a'n lo dang mah se an goal lam hnaiah ball a per phei a, Brazil captain Neymar chuan minute 32-naah keeper David de Gea dan hman lohin chiang zetin goal a khung a ni.

United manager Mourinho chuan, "United States-ah Real Madrid, Barcelona leh Manchester City te nen kan inkhel a ni a, tlawm nei loin haw ni ta ila a ṭha lo zawk ang. Hneh loh nei loa kan haw hi kan tan a ṭha zawk, hmasawn tur chuan inzirna tur kan mamawh a ni," tiin a sawi.

Chelsea manager hlui hian Barcelona leh Real Madrid te chu player lang­sar leh ṭha rual awm­khawmna an nih thu a zep lo a, La Liga club lian pahnihte player ang thoin khawvela player manto ber Paul Pogba chu a ṭhat tawk ve bawk thu a sawi tel.

Manchester United hian season thar inbuatsaih nan match hnih an la khel leh dawn, Pathianni hian Norwegian club Valerenga an hmachhawn ang a, karleh Nilaniah Italian club Sampdoria nen an inkhel leh bawk ang. Europa League champion hi Champions League nomawi kawltu Real Madrid nen August 8 khian UEFA Super Cup-ah an inhmachhawn ang.

Hetihlai hian Barce­lona erawhin match khat bak an khel tawh dawn lo. Inrinni hian Hard Rock Stadium, Miami-ah Real Madrid an hmachhawn ang. Spanish club lian pahnihte hi season thara league nomawi inchuh tur bawk an ni a, friendly match pawh nise an inkhel boruak hi a dai thei lo.

Inkhel Te
United : De Gea (Romero 46), Valencia (Tuanzebe 84), Smalling (Bailly 46), Lindelof (Jones 46), Blind (Darmian 46), Carrick (c) (Fellaini 46), Pogba, Mkhitaryan (A. Pereira 62), Rashford, Lingard (Martial 62), Lukaku.
Substitutes: J. Pereira, Fosu-Mensah, Mitchell, McTominay.
Barcelona first half : Cillessen, Semedo, Umtiti, Mascherano, Jordi Alba, Busquets, Alena, Rakitic, Messi (c), Neymar, Suarez.
Barcelona second half: Cillessen, Pique, Denis, Arda, Iniesta, Vermaelen, Alcacer, Digne, Roberto (Samper 85), A.Vidal, Munir.