Novak Djokovic tan season a tawp

Grand Slam vawi 12 champion tawh Novak Djokovic chu tun season chhungin tennis court-ah a inkhel kan hmu thei tawh dawn lo. Serbian tlangval hi a kiu (elbow) dinglam na vangin chawlhkar 12 chhung vel a chawlh a ngai dawn a ni.

July 12 khan Djokovic hi Wimbledon quarterfinal aṭangin Tomas Berdych-a'n a vaw tla a, hemi hnuah a la inkhel leh lo. He a hliam hi thla 13 chhung zet a lo buaipui tawh a ni a, zai ngai dawn lo mah se ngaiawh leh tur chuan chawlh a mamawh.

World number 4 Djo­kovic chuan, "Infiam­mi thinlung aṭang chuan inkhel thei lo tura chawlh tur thu sawi hi a hrehawm hle. Mahse, tunah chuan a ṭha lam ka en hram hram a ngai a ni," tiin kumin chhunga a inkhelh theih tawh loh tur thu a sawi.

Tun season-a Grand Slam hnuhnung ber atan August 28 hian US Open khelh a ni dawn a, vawi hnih a champion tawhna hmunah hian a inlan thei dawn lo. Flushing Meadows-a a inlan theih dawn loh takah chuan a zawna major tournament vawi 51 a khelh tawh chu a tawp dawn ta tihna a ni.

Kum 30 mi Djokovic chuan chawlh a mamawh thu sawiin, "Doctor hrang hrang ka rawn a, kan ram Serbia mai bakah khawvela a ṭha ṭha ka hmu hnem hle, an zavai maiin chawlh ka mamawh thu min hrilh," a ti.

Djokovic chuan sawi chhunzawmin, "Ka kiu na vang hian a tirah khan service kawngah harsatna ka nei a, a rei hnuah forehand thlengin ka buai. Tennis ka khelhtirh lampang khan ka hriselna a ṭha tawk lo, tun hnaiah erawh hliam ka nei ngai lo. Tunah chuan ka hahchawlh ve leh phawt a ngai a ni," tiin a sawi.

World number 1 hlui Djokovic hian season hmasa chawhnu lam aṭang khan beisei a phak lo a, kuminah pawh Australian Open leh French Open nomawi a kawl lai chu a hloh tawh. Coach lailawk Andre Agassi nen season tharah an thawkdun leh dawn a, kumina hard courd season zawng zawng-ah inlan loin nakkum January thla atan zawi muangin inbuatsaihna a nei zui dawn ta zawk a ni.

Nikum khan Roger Federer pawh hun rei zawk inkhelh a duh avangin season chawhnu lam zawng a chawl tawh a, kuminah ropui taka rawn kir lehin Grand Slam nomawi pahnih a chawi belh leh thei. Djokovic hian Swiss star tih ang hian a ti ve thei ang ngem tih chu hunin a la hril dawn.