Season bul ṭan lo tur Mendy?

Khawvela defender manto ber Benjamin Mendy chuan Manchester City tan Premier League season bul a ṭan thei lo mai thei. Pound maktaduai 52 man Mendy hi a malpui tihrawl hliam vangin a inkhel thei lo mek.

Pep Guardiola naute hian season thar inbuatsaih nan nimin zing khan Real Madrid an hmachhawn a, Nicolas Otamendi, Raheem Sterling, John Stones leh kum 17 mi Brahim Diaz te goal hmangin 4-1 in an chak. Real tan hun tawp dawna Oscar Rodriguez goal khungin awmzia a nei lo - City hian pre season tour chhunga chak ni hmel an hmuhna hmasa ber a ni.

Los Angeles Memorial Coliseum-ah inkhel en turin mipui 93,098 zet an pungkhawm a, AS Monaco defender hlui Mendy a luh theih loh avangin tlarhnung veilam kilah Danilo hmel kan hmu a, pound maktaduai 26.5 man defender hian a club hlui a hmachhawn nghal.

City manager Guardiola chuan Mendy chungchang sawiin, "Mendy hi chawlhkar hnih emaw kar thum emaw a chawlh a ngai dawn, player manto tak a nih avangin hliam nei chungin kan inkhelh luihtir duh lo," a ti. Premier League hi August 11-ah khelh ṭan tur a ni ang.

Spanish manager Pep chuan sawi chhunzawmin, "Real Madrid laka kan khelh anga kan khel chhuak thei a nih chuan club lian dang elphak turin kan ṭha tawk tihna a ni. Khawvela a ṭha berte zinga tel hi kan thil tum a ni," a ti. Pep hian an playmaker David Silva chu league match hmasa bera kaithar Brighton an khelh hunah a inlan theih tur thu a sawi chiang bawk.

Barcelona manager hlui hian season hmasa lama a hman thiam tawh Kevin de Bruyne chu a dahsang leh hle, Belgian international hian La Liga champion lakah a ṭhiante goal khung tur vawi thum a siam sak a ni. Pep chuan, "Kevin hian a khelh fuh ni chuan a duh duh a ti thei, a boruak fuhni a nih zel ka beisei," a ti.

Inkhelte

MANCHESTER CITY (3-5-2): Ederson (Grimshaw 80); Kompany (Mangala 46), Stones, Otamendi (Adarabioyo 80); Walker (Duhaney 69), De Bruyne (Zinchenko 69), Toure (Roberts 80), Foden (Nasri 46), Danilo (Sane 80); Gabriel Jesus (Diaz 69), Aguero (Sterling 46). Subs: Muric, D Silva, Fernandinho.

REAL MADRID (4-3-3): Navas (Casilla 46); Carvajal, Varane, Nacho, Marcelo; Kovacic, Casemiro, Modric; Isco, Benzema, Bale. Subs: Asensio, Tejero, Oscar, Yanez, Mayoral, Vazquez, Ramos, Franchu, Hernandez, Zidane, Ceballos, Manu, Quezada, Llorente, Kroos, Vallejo, Gomez.