Ramhlun North-ah Nigerian striker 2

Mizoram Premier League club Ramhlun North-in tun season chhunga nomawi chawi ngei tumin Nigerian striker pahnih Oneyeama Francis leh Olaniran Joseph Segun te an lalut.

Vawiin tlai dar 3:15 hian Ramhlun North hian I Day Football-ah Dinthar FC an hmachhawn dawn a, foreigner pahnih hi RG Stadium-ah an inlan hman beisei a ni.

Ramhlun North hian MPL5 Qualifier-ah pakhatna niin MPL khel turin an tling a, he inelnaah hian first division aṭang tawha an elpui Chhinga Veng FC chungah an awm. Season khat nomawi an chawi loh ve ve hnuah Chhingcows-in MFA Super Cup an champion a, Ramhlun North-in an elpui an phak ta lo.

Ramhlun North honorary secre­tary K. Lalenghluna (Ma­enga) chuan, "Nomawi chawi hi kan châk a, hei vang hian trans­fer-ah pawh sum hmang na ber pawl kan ni. Amaherawhchu MFA Super Cup-ah kan vanduai ta leh si a, nomawi lak theih dan kawng dapin Nigerian forward pahnih kan lalut ta a ni," tiin nomawi lak ve ngei an tum thu Vanglaini a hrilh.

MPL club hian MFA Super Cup-ah Aizawl FC Academy chu penalty shootout-ah an hneh lo a, hun pangngaiah goal an khung thei lo. Hei vang hian season liam taa goal hnih khungtu Nigerian forward Francis-a an ko let a, hetah hian lungawi loin Olaniran Joseph Segun an lalut tel bawk.

Joseph hi Gauhati Town Club tan pawha khel tawh a ni a, Ramhlun North hian foreigner pahnih hi Chennai club Arrows FC aṭangin an la chhuak.

MPL club hian Lalliansanga (Notea), Lalrinfela, Jessy Vanlalmuana, Rosangliana leh Lalramzauva te an neih sa bawk avangin an goal nawr a na sawt ang.

Ramhlun North khingpui tur Dinthar FC pawhin season liam taa an player pawimawh Clarence Carter chu an chelh leh tawh a, Nigerian midfielder hian hmun pawimawh a chang nghal.

MFA Super Cup neih zawh takah Maimawms hian quarterfinal an thleng thei a, I Day Football-ah result ṭha zawk neih an tum dawn. 2014 I Day Football champion Dinthar hian la champion ngai lo Ramhlun North lakah tlawm an duh dawn lo.