Futsal inelna lian Mizoram Futsal League

Mizoram Football Association chuan a hnuaia Futsal Committee kal tlangin Mizoram Futsal League buatsaih a tum a, League season hmasa ber chu kum thar January - February-a neih tum a ni.

Mizoram chhunga awmze neia futsal khelh a nih theih nan MFA chuan Futsal Study Group a din a, he group hmalakna zulzuiin Futsal Committee chuan Mizorama futsal kalpui dan tur kawng hrang hrang a rel a.

FIFA dan ang zelin inkhel hi kalpui a ni ang a, AIFF lam pawhin Mizorama Futsal kalpui dan a vilpui dawn. MFA hian a ṭul angin training pe turin AIFF a sawm ṭhin ang.

Mi zawng zawng tan

MFA chuan inkhelh ngainatu a tam thei ang berin futsal an khelh theih dan turin ruahmanna a siam a, Mizoram Futsal League khel remchang hman lo tan pawh futsal khel tura inziahlut theih a ni dawn.

Futsal Committee hnuaiah team chi hnih a awm dawn a, Futsal League khelh tum leh tum loa thliar tur a ni.

Mizoram Futsal League-ah hian team/franchise 16 awm tura duan a ni a, league a khel tur te hi playoff hmanga zawn tur a ni.

Futsal club nei duh chuan MFA Futsal Committee hnuaiah club registration an tih a ṭul ang a, player tan pawh inkhel tur chuan registration tih a ṭul ang.

Football inelna pangngai leh futsal registration hi a kal hrang a, chutihrualin tihkawp theih a ni thung. MPL player leh District FA player-te pawhin an club khelhna phalnain futsal club-ah an inziak lut thei ang.

Futsal League

MFA hnuaia Mizoram Futsal League khelh tumte tan a hnuaia criteria duan hi zawm a ṭul ang.

1. Veng/Khua behchhan club an ni tur a ni a; veng/khaw khat hmingin club khat zel a ni tur a ni. An awmna Village Council/Local Council-in a pawmpui tur a ni.

2. Entry fee Rs 1,000 a ni a, hei bakah hian Security Deposit cheng 10,000/- dah tur a ni. Futsal League khel phak lo Playoff lama tlate chu an Security Deposit pek kir a ni ang.

3. Jersey set hnih (Home and away) an nei tur a ni.

4. Players register theih chin chu mi 20 aia tam lo leh mi 14 aia tlem lo an ni tur a ni.

5. Team Squad-ah hian veng/khaw chhung mi panga tal an awm tur a ni.

6. Playing 5-ah vengchhung mi pakhat tal a awm reng tur a ni.

7. Team manager, coach leh physio an nei ṭheuh tur a ni.

Playoff

Mizoram Futsal League Playoff hi September, 2017-a khelh ṭan tum a ni a, August thla chhunga registration tihfel tur a ni. Playoff khel tur chu tehna (criteria) siam zawm thei chin tan a ni ang.

Transfer window chu Futsal League khelh ṭan hma, December-ah hawn a ni leh ang.

Registration chi hnih

Futsal League a tel tum playoff khel tur club te bakah, Futsal Club pangngai Futsal League-a khelh tum ve lem lote tan in register theih a ni dawn. MFA Office, City Park-ah registration form hi Rs 50 in lak theih a ni ang.

August ni 1, 2017 aṭangin registration hawn a ni ang. Registration hi thla khat chhunga zawhfel tur a ni a, August 31 thleng hun hawn a ni ang. Player pakhat registration fee atan cheng 100/- bituk a ni a, online registration pawh tih theih tura ruahman a ni ang.

League khelh tum lo

Mizoram Futsal League khelh tum lote tan hetiang criteria hi zam a ni bawk.

1. Security deposit Cheng 2000/-

2. Club tinin Jersey an nei tur a ni.

3. Team hming mumal tak an nei tur a ni.

Heng club-te tan hian MFA chuan inel­na a buatsaih ṭhin dawn a, MFA hriat­pui tournament dangah pawh an tel thei ang.

Futsal Match Official

Asian Football Confederation buatsaihin August thla tir hian New Delhi-ah Futsal Seminar a awm dawn a, MFA chuan official pahnih a tir dawn.

MFA Futsal Committee chuan August thla chhung ngei hian Futsal Match Official Training buatsaih a tum a, FIFA dan ang taka Mizorama Futsal kalpui turin ṭan a la zel ang.

Hei bakah hian Futsal chungchanga inrawnkhawmna buatsaih a tum bawk.

MFA hnuaiah Futsal

AIFF aṭang­a thu pek a dawn angin MFA hnuaia registered player-te chu MFA hriatpui loh eng inelnaah mah an tel thei lo ang. MFA Futsal hnuaia registration hawn turah hian, MFA hriatpui loh hmun danga registration nei chu a registration neih sa a thai bo (cancel) a nih loh chuan a tel thei lo ang.

MFA chuan Asian Football Confe­deration-in India ramah Futsal chawi lar tura hma a lak tur hi a ṭangkai thei ang bera chhawr tumin ṭan a la zel dawn a ni.