Monaco-ah Mbappe a cham dawn?

Ligue 1 champion AS Monaco chuan Real Madrid nen inremna nei tawh anga sawi an striker Kylian Mbappe chu contract thar an zawrh mek thu an sawi. Spanish chanchinbu lar Marca chuan kum 18-a upa striker lalut tur hian Real Madrid chuan pound maktaduai 160 thehchhuah an remti niin an tarlang a, mahse Monaco vice president Vadim Vasilyev chuan an striker hi contract thar an zawrh mek thu a sawi.

Vasilyev chuan, "Ky­lian hi kan hnena a cham chhunzawm zel theih nan indawrna neihpui mek a ni a, inremna kan neih thuai ka beisei a ni," a ti a, Real Madrid tan thu hriat nuam a ni lo ang. Monaco vice president chuan sawi chhunzawmin, "Mbappe hralh chhuak tur hian eng club mah inremna kan la neihpui lo. A contract pawhsei tumin inbe mek mah ila hmanhmawh taka tur erawh kan tum lo. Inngaihtuahna hun a neih ve hi kan duhsak a, kum 18 chauh a la ni tih hi kan hre reng tur a ni," tiin an striker chu pressure siam an duh loh thu a sawi nghal.

Mbappe hi Man­ches­­­ter City nen pawh sawi­zawm hman ni mah se English club hian pound maktaduai 160 insen an huam lo nia tarlan a ni a, Monaco vice president Vasilyev chuan Arsenal-in lakluh an tum Thomas Lemar leh Manchester United nena sawizawm hlawh mek Fabinho-te chu an hnenah an cham tur thu a sawi bawk.