AC Milan-in an ropuina neih let an tum

Italian football sawi rualin rilruah Serie A club ṭhenkhat a rawn lang ṭhin, chung zinga langsar tak pakhat chu AC Milan a ni. Tun hnai kum ruk chhung erawh chu Milan hian chanchin ngaihnawm leh langsar sawi tur an nei tlem hle, league lamah pawh an tiatpui ni ṭhin Juventus an phak lo viau.

Italian prime minister hlui Silvio Berlusconi-a'n kum 1986 aṭanga a enkawl tawh club hi hmalam pan turin ke a pen pui thei meuh tawh lo a, a tawpah loh theih lohna vangin a hralh a ṭul. A tifuh dawn nge a duh loh danin thil a thleng chho dawn tih chu khawvel hriat châk a ni.

Berlusconi hian awlsam leh duhdah takin Milan hi a hralh mawl tawp lem lo, April thlatir khan Chinese investor Rossoneri Sport Investment Lux kutah pound maktaduai 628-in a hlan pumhlum ta a, an inrem dan chuan Chinese sumdawng hausa hmalakna turin club tihhmasawn leh stadium thar a tel.

Milan-in neitu thar a neih aṭangin thla thum pawh a la liam hman lo, a neitu leh president ni bawk Li Yonghong, board member Li David Han leh CEO Marco Fassone ten Berlusconi hnena an intiam ang ngeiin hma an la ta. An hausakna miau avangin sum an ren lo, tun nipui transfer chhungin player thar lakluh nan pound maktaduai 155 an hmang tling ta hem mai! Tun hma lama an ropuina ang kha neih let an tum tih chu a takin an lantir chho mek.

Tum an nei

Nikum June 28 khan Milan hian manager thar an nei, a hming chu Vincenzo Montella a ni. Italian manager hian a hna a ṭan hnu lawkah, "Juventus nena khaikhin tur chuan kan dinhmun hi a la inthlau hle, tun chuan Europe-a inlan kan tum phawt anga, chumi hnuah a aia sang," tiin an dinhmun chiang takin a sawi.

Season hmasa khan Milan hian point 63 hmuin champion Juventus chu point 28 zetin an phak lo. Mahse, Montella sawi ang ngeiin Milan hi Serie A-ah parukna an ni a, Europa League an khel dawn. Player a nih laia ram tana match 20 kheltu Montella chuan season thar a thlir a, Turin club elphak an nih a beisei thu a sawi ta riap mai.

Club sporting director Massimiliano Mirabelli chuan, "Hma kan sawn mek, thil kan suangtuah leh ngaihruat ṭhin kha tunah chuan a takin a thleng chho mek zel. Kan chak tawk lohna lai thuam chak a ngai a, hmanraw hlui tawhte tuai hriam bakah a thara thlak a ṭul. Tun aṭanga season thum a liam leh meuh chuan khawvela a ṭha berte zinga mi nih leh kan tum," a ti ta riap mai, club ropui Milan kha kan hmu leh dawn niin a lang ta ruak mai.

Lakluh runpui

Serie A nomawi vawi 18 zet chawi tawh Milan hian tun nipui transfer laiin player 10 an la tling der tawh. Tlarhnunga an hotupa ni thei turin Italy international defender Leonardo Bonucci chu an elpui Juventus aṭangin an lalut. Player an lak thar zingah Andre Silva, Hakan Calhanoglu, Andrea Conti, Mateo Musacchio, Ricardo Rodriguez leh Lucas Biglia te pawh hming langsar an ni phak. Club lian dangin an awh rawn mek goalkeeper Gianluigi Donnarumma chu contract thar an ziah pui thei bawk.

Kum 30 mi Bonucci hian tawnhriat a nei hnem tawh, Inter Milan tan league nomawi vawi khat a chawi hnuah Juventus tan a zawnin season ruk chhung Serie A title a la tawh a, Coppa Italia nomawi vawi thum a chawi tawh bawk - Turin club hlawhtlinnaah Bonucci hi player pawimawh a ni phak vek.

Feet 6 leh inches 3-a sang defender hian khelmual chhung leh pawnah player naupang zawk tan entawn tur tam tak a hnutchhiah thei tura ngaih a ni. A hnunga si ban nghak tur rawlthar Donnarumma tan pawh thlamuan pui tham tura ngaih a ni bawk. Italian defending ropui champion pui ṭhin club hian insawhngheh an tum hle.

European Cup/UEFA Cham­pions League nomawi vawi sarih chawi tawh club hian tun lai football-ah chuan goal vemhim ngawt a tawk lo tih an hria a, tlarhma tichak turin kum 21 mi Andre Silva chu Porto aṭangin pound maktaduai 33.5 in an lalut a, tunlai transfer bazar sum leng vel ngaihtuah chuan Silva hi an lei man hle a ngaih theih a ni.

Portugal international Silva hian season hmasa khan a club tan match 44 a khelh aṭangin goal 21 a khung a, ram tan match 13 a khelh tawhah goal riat a khung tawh bawk - a kum a la naupan ngaihtuahin a record hi a chhe lo hle.

Real Madrid star Cristiano Ronaldo chuan, "Portugal tana inkhelh ka chawlh san a nih pawhin kan ram hi goal khung kawngah ngaihtuahawm an ni lo ang, hmun himah an awm tawh. Striker ṭha kan nei tawh a ni," tiin Silva chu ram tana innghahna tlak a nih thu a lo sawi tawh.

Khawvel forward hriam ber pakhat Ronaldo-a'n an ram tana innghahna tlak tia a sawi Silva hi Milan tan pawh thlamuanpui tham tura ngaih a ni, Porto striker hlui thlawp tur hian midfielder Lucas Biglia chu Serie A lama an elpui Lazio aṭangin an lalut bawk - season tharah Juventus elphak Milan kan hmu a nih pawhin a mak lo ang.