Barkley a chhuak dawn chiang

Everton manager Ronald Koeman chuan an midfielder Ross Bark­ley chuan chona thar hmachhawn a duh avangin a chhuah ngei tur thu a sawi. Kum 23 mi Barkley hian Goodison Park-ah kum khat cham turin con­tract a la nei mek a, mah se contract thar a ziak duh rih lo.

Koeman chuan, "Barkley hi contract duhawm tak kan zawrh a, mah se a ziak duh tlat lo," a ti a, English midfielder manah hian pound maktaduai 50 an chhiar. Mahse, Barkley hi thla 12 hnua a contract hmang zo mai tur a ni tawh a, August 31-a transfer theih hun a tawp hma chuan a man hi a tla hniam hman tura ngaih a ni.

Dutch manager chuan sawi chhunzawmin, "Ross hian season tawp lamah khan hmun danga kal a duh thu min hrilh a ni. Ross chungchangah hian buai tam ka tum lo a, thutlukna chu a kutah ka dah mai. Kei chuan player dang ngaihven ka duh zawk a, season tawp lamah khan Ross dinhmun hi chu ka hre vek tawh," tiin an hnena cham duh lo player chelh tumna a nei lo.

Everton hian Swansea City midfielder Gylfi Sigurdsson chu pound maktaduai 40-a lakluh tumin Welsh club an dawr a, hnawl a ni. Hetichung hian Koeman chuan Iceland international lak­luh an tumna chu an ban­san loh tur thu a sawi.