Champions League Qualifying ; Celtic-in goal an khung thei lo
Scottish champion Celtic-in season thara Champions League khelh ngei tumin third qualifying round-ah Rosenborg an mikhual a, club pahnih hi goal lut loin an inṭhen.
Celtic-a inkhelah mualneitu aiin Norwegian club an hlauhawm zawk a, Vegar Eggen Hedenstad chuan free kick hmanga Celtic goalkeeper Craig Gordon 'enchhinna' a neih hnu lawkah Yann-Erik de Lanlay chuan hnai set sawt aṭangin a pet over - Brendan Rodgers-a naute an vannei hle.
Scottish club tan James Forrest leh Stuart Armstrong ten chance hlauhawm nei ve tho mah se an hun ṭha neih an chhawr thei bik lo a, Rosenborg tan substitute Matthias Vilhjalmsson chuan Gordon tan hna a siamsak leh bawk - a tawpna erawh goal a lut lo a, mualneitu Celtic chu vannei zawkah ngaih an ni.
Dembele tel loin
Celtic-in an rawlthar chhuanvawr Moussa Dembele loin Rosenborg an mikhual a, Norwegian club tan hian Arsenal striker hlui Nicklas Bendtner a inlan thung. Dembele inlan theih loh chhan hi hliam a neih vang a ni a, striker Leigh Griffiths chu hrem a nih vanga inlan lo ni mah se hliam a nei ve mek bawk.
Scottish club-in tlarhmaa an chhuanvawr pahnih tel loin ngai an awh lo tih a lang chiang a, Rosenborg tlarhnung an chhaih mangang thei meuh lo - a awm lo hran lo, kum 21-a upa Dembele hian season hman zawh takah khan goal 32 a khung a, Scotland international Griffiths hian goal 18 a khung ve bawk. Heti zat goal khung thei pahnih tel loa Celtic an buai hi dem an har.
French forward Dembele hi malpui hliam vanga chawl mek a ni a, Celtic boss Brendan Rodgers chuan, "Dembele lo kir leh hun tur chu September thla tir vel a nih a ngai tawh ang," tiin a sawi a, kum 26-a upa Griffiths hliam erawh a serious lo.
Rodgers a inringtawk
Celtic-in hnehna an chang zo lo mai a ni lo a, goal an chhuah loh avangin an vannei. Mahse, hetichung hian Brendan Rodgers erawh a zam lo a, khualmualah hnehna an chan theih a beisei. Liverpool boss hlui chuan, "A hun lo thleng se kan la hria ang chu. Tuna kan hriat erawh khualmualah hnehna kan chang thei tih hi a ni a, kan khelmualah aiin khualmualah goal kan khung hnem fo a ni," a ti.
Rodgers chuan an inkhel thlirkirin, "Kan result avang hian kan lawm lo tih chu zep tur a awm lo. Mahse, Europe-a goal khung loa inhnehtawk erawh result chhe tak tia sawi tur a ni hran lo. Ka player-te khelh danah ka lawm a, a bik takin first half kha kan khel ṭha takzet a ni," tiin a sawi.
Northern Irish manager chuan, "Kan tumpuite kha goal khung loa kan inhnehtawk avangin an hlim ngei ang a, keini pawh kan hlim tho. An khelmuala kan kal hunah keini chuan goal kan khung mai dawn a ni," tiin a naute a ringtawk hle.
Hmabak chu
Celtic hi season hman zawh takah khan domestic treble champion an ni a, Scotland-a nomawi chawi theih Scottish Premiership, Scottish Cup leh League Cup an chawi vek. League nomawi an chawi avang hian Champions League qualifying round khel turin an tling.
Champions League hi first qualifying round aṭangin khelh ṭan a ni a, Celtic hi second qualifying round
aṭangin an inlan. Second round-ah hian Linfield chu inkhel pahnih belhkhawmah 6-0 in an sawp a, third qualifying round hi an inpetkai.
Third qualifying round hi an paltlang a nih chuan playoff an khel leh dawn a, playoff hi an paltlang chuan group stage an inhlangkai tawh dawn tihna a ni. Celtic hian an match hnihna hi August 2-ah Norway-ah Rosenborg nen hian an khel leh dawn a ni.
Ajax 1-1 Nice
Champions League third qualifying round inkhel ngaihven hlawh dangah Nice leh Ajax chu goal khat ve ve khungin an inhnehtawk bawk. France-a inkhelah mualneitu team tan Mario Balotelli chuan goal hmahruai a khung a, Jean Seri hnen aṭanga a ball hmuh chu minute 32-naah goal ruakah a khung.
Season hmasaa Europa League finalist tan Donny van de Beek chuan minute 49-naah an si phurh sutna goal a khung a, goal dang a lut tawh lo. Second leg hi Ajax khelmualah khelh tur a nih dawn avangin Dutch club tan playoff khel turin an dinhmun a ṭha zawk.
French club Nice hian August 2-ah Ajax khelmual hi second leg khel turin an pan ve leh dawn a ni.