Tuarna pawh hlawkna - Sharapova

Grand Slam vawi nga champion tawh Maria Sharapova chuan thla 15 chhung hrem a nih avangin a rilru a hnual phah loh thu a sawi a, hrem a tawrhna chu court chhunga result ṭha neih phah nan hman theih a inbeisei thu a sawi chhuak.

World number 1 hlui hi damdawi hman phal loh 'meldonium' a hmang tih hmuhchhuah a nih vangin a tirah chuan kum hnih chhung atan hrem a ni a, a khin let hnuah thla 15 atan tih tawi sak a ni. Sharapova hian hremna a hmachhawn zo tawh a, tun hnaia a inkhelh theih loh chhan chu hliam vang zawk a ni.

Hard court season hmang tura inbuatsaih mek Sharapova chuan, "Tun hnai kum hnih chhungin thil hrang hrang ka tawng a, tennis ka khelh tawh china ka hun harsa ber pawh a tel hial. Mahse, buaina leh harsatna tawk mah ila ka hnual phah lo a, mi ti ṭangtu zawk atan hman ka tum a ni," tiin a sawi.

Kuminah Grand Slam hnuhnung ber US Open chiah khelh hmabak a awm tawh a, sum tamna berah hian Russia nula hi inlan a tum hle. Karleh chhung hian WTA tournament pakhat Stanford-ah wild­card a hmuh angin a inlan ang.