Conte-a'n Spurs a kap na

Premier League ṭan hun a hnai a, boruak a hot chho sawt hle. Chelsea manager Antonio Conte chuan an elpui Tottenham Hotspur chuan nomawi an chawi phak lo a nih pawhin an tan thil pangngai ve reng a nih tur thu a sawi chhuak.

Spurs hian tun nipui trasfer chhungin player langsar lakluh an la nei lo a, an defender rinrawl Kyle Walker chu Manchester City lakah pound maktaduai 45-in an hralh, stadium thar an sak mek avangin White Hart Lane an hmang thei dawn lo a, season tharah chuan Wembley Stadium-ah home game an khel dawn a ni.

Season hmasa khan Spurs hi league-ah pahnihna an ni a, an tluk loh chu Chelsea chiah an ni. Mauricio Pochettino kaihhruaina hnuaiah Champions League an khel dawn bawk.

Italian manager Conte chuan an elpui club chungchang sawiin, "Spurs hian league title an la lo a nih pawhin an tan chhiatna a ni lo ang. Champions League an khel phak lo emaw, first round-ah tlain Europa League an khel zui a nih pawhin a mak lo ang," tiin Spurs chu club lian zingah a chhiar tel lo.

Juventus manager hlui chuan sawi chhunzawmin, "A chunga ka sawi takte hi Chelsea, Arsenal, Manchester City leh Manchester United ten an tawng lo a nih chuan an tan chhiatna a tling, Liverpool tan pawh a ni phak mai thei. Tun dinhmuna club len zawng hi kan teh thiam tur a ni," a ti.

Hetihlai hian Conte chuan Spurs hian an player neih lai te hi an chelh vek thei a nih chuan elpui hautak an nih theih tur zia a hmuh hmaih bik lo. Season hmasa league match 30 a khelh aṭanga goal 29 khung thei Harry Kane chu a dah sang hle.

Conte chuan, "Striker pa­khat lei tur ni ta ila Kane hi ka lei duh chu a ni. England inter­national hi a theihna a sang em em a, striker ṭhain a neih tur ang chu a nei kim vek. Ka hmuh dan chuan khawvela a ṭha ber pakhat chu a ni," tiin a sawi.