Mumbai City-ah Lucian Goian a nghet

Indian Super League club Mumbai City chuan Romanian centre back Lucian Goian chu kum hnih dang an hnena khelh chhunzawm turin contract an ziahpui. Kum 34 mi defender hian nikumah khan Mumbai club tan hian a lo khel tawh a, ISL season zawh hnuah A League club Perth Glory zawmin tunah chuan India-ah a lo kir leh dawn ta.

Romania U21 international hlui hi Chinese Super League club Tianjin Teda tan a khelh laiin tuna Mumbai City coach Alexandre Guimaraes nen hian an lo thawkdun tawh ṭhin a, India-ah pawh an inzui ta zel a ni. Dinamo Bucuresti tan a khel ṭhin a, Romanian club lian tana a khelh lai hian Champions League leh Europa League-ah hial pawh lo inlan tawhin Mumbai City tan a tawnhriat hi a ṭangkai khawp ang.

Dinamo tan a khelh laia Romania-a nomawi chawi theih zawng zawng chawitu defender chuan, "Mumbai-a ka lo kir leh thei hi ka lawm takzet a, coach Alex nena kan thawhdunna ṭha takin min rawn hruai kir a ni," a ti a, season hmasa ISL aṭanga tawnhriat tam tak a neih thu a sawi tel bawk.