Villarreal mangṭhatu Santi Cazorla

Arsenal tana a khelh ṭhin avangin Santi Cazorla hian Mizo zingah chuan hriat a hlawh hle - Pathianni zan khan amah siam liantu Villarreal tan a match tawp ber a khel a, Spanish club tan a inlan leh tawh ngai dawn lo. 

Villarreal hian Pathianni zan khan Eibar chu 4-0 ngawtin an sawp a, minute 82-naah Cazorla hi lakchhuah niin khelmuala awm coaching staff leh player-ten ding chungin zahna nen an thlah. Cazorla hian Arsenal tana a khelh laiin October 2016 khan Champions League match-a Ludogorets Razgrad an hmachhawn ṭumin hliam na tak a tuar a, hetihlaia amah enkawltu doctor-te chuan a kal leh theih an rin loh thu an hrilh hial.

Mahse, Cazorla hi beidawng duh loin theihtawp a chhuah a, kum 2018 khan Villarreal tan lo kirin match 46-ah goal sarih ngawt a khungsak. A kal theih tawh loh tur thu an hrilh player khan tun season inelna hrang hrangah match 39 khelin goal 15 a khung a, assist vawi 11 zet a nei - Xavi enkawl Al-Sadd a zawm, a kum tam deuh tawh mah se inkhelh a la chawlhsan dawn lo. Sum tam zawk a la pet chhuak dawn. Santi Cazorla chuan, "Villarreal-in ka tana kawng an hawn avang khan ka lawm a, ka chunga hmangaihna in lantir zawng zawngah khan kumkhuain ka lawm dawn a ni," a ti a, "Villarreal hi ka in a ni reng ang," tiin a thlah zui.