Trapp-a'n Man United pan a tum lo

Manchester United-in David de Gea thachhang dawl turin Kevin Trapp lak an tum a, German goalkeeper-in Old Trafford pan a tum lo. Trapp an lak theih loh avangin loan-in Newcastle United keeper Martin Dubravka lak an tum.

Eintracht Frankfurt goalkeeper Kevin Trapp chuan, "Khawvel club ropui zinga mi Manchester United aṭangin ziakin min lak duh thu ka dawng. Ka club khelh mekna leh min dawrtu club thuneitute hnenah ka club khelh meknaa cham ka duh thu ka hriattir," tiin a sawi.

Kum 32 mi Trapp hi FC Kaiserslautern aṭanga lar chhuak niin Paris Saint-Germain tan pawh a khel tawh a, season liam taa Eintracht Frankfurt-in Europa League an champion theih nana player pawimawh a ni.

Man United hian Martin Dubravka lak tumin hma an la chhunzawm a, June 2023 thleng loan hmanga lak an tum. Kum 33 mi Dubravka hian an ram Slovakia tan match 30 a khel tawh a, Newcastle-in pound maktaduai 10-a England international keeper Nick Pope an lakluh avangin khelhna hmun a chang pha lo.

Erik Ten Hag-a'n squad thuam ṭhat tumin nipui transfer hman ṭangkai a la tum hle. Ajax forward Antony chu United hmachhawp lian ber a ni a, ni 11 liam ta khan kum nga atan player nen chuan inremna an nei tawh a, club pahnih hi an inrem a la ṭul.

Ajax-in Antony manah hian euro maktaduai 100 an beisei a, Man United hian inremna an neih theih beiseiin Dutch club nen indawrna kalpui leh hmain Antony leh a agent-te an dawr leh phawt. English club hian euro maktaduai 94 bakah a chet ṭhat dan a zira sum pek belh leh turin Ajax hi dawr leh an tum niin sawi a awm a, tunkar chhungin inremna an neih theih an beisei a ni.