PSV ngamtu Rangers-in Champions League khel dawn
Kum 10 liam ta maia Scottish fourth division-a inlan Rangers chuan football thawnthu ngaihnawm bik min hlui a, season tharah Champions League an khel dawn - ni e, i chhiar dik e!
Steven Gerrard-a chhuahsan tak Rangers hian Champions League playoff second leg-ah PSV Eindhoven chu 1-0 in an hneh a, inkhel hmasa nena belhkhawmah 3-2 a chakin an tlang.
Rangers tan Antonio Colak chuan inkhela goal awmchhun a khung a, mualneitu PSV lamin a chhanletna tur an neih loh avangin Champions League khelh an beiseina chu an mangṭha a ṭul ta rih.
Nilaini zana playoff second leg inkhel dangah Dinamo Zagreb chuan 4-1 in Bodo/Glimt an sawp a, aggregate-ah 4-2 a chakin Champions League an inpet tling - Trabzonspor chuan 0-0 in FC Copenhagen chelh mah se, first leg-ah 2-1 an an tlawm avangin Copenhagen an tlang.
Dutch indona!
Rangers boss hi an player hlui, Barcelona tan pawha lo khel tawh Giovanni van Bronckhorst a ni a, a vanglaiin ram tan match 106 a khel hman - goal ruk a khungsak a, World Cup 2010-ah khan ram tana a match hnuhnung ber a khel.
Hetihlai hian PSV enkawltu hi Ruud van Nistelrooy a ni a, Manchester United legend hi Netherlands tan vawi 70 inlana goal 35 khungtu a ni a, Van Bronckhorst nen ram tan an khel dun nual hman.
Mahse, coach pahnih hian an intawn hmain an inṭhianṭhatna an dah ṭhat tur thu an sawi a, a tawpah chuan Van Bronckhorst a dingchang zawk - Rangers khelmualah team pahnih hi 2-2 in an inhnehtawk a, mahni muala la khel leh tur PSV dinhmun a ṭha zawka ngaih a ni.
Rin leh beisei ang ngawtin thil erawh a thleng bik lo. Rangers-in khualmualah chak an tum ngam a, an beisei ang ngeiin hnehna an chang ta - Van Bronckhorst-a'n fak a phu takzet.
Thutlukna huaisen
Rangers-in Alfredo Morelos an nei a, mahse, Colombian striker hi a nunchang avangin harsatna a awm fo - Steven Gerrard kherin enkawl ṭhin lo se Morelos hi a chhuah daih tawh ringtu an tam.
Gerrard hian striker ṭha zawkah a siam a, team innghah nan a hmang. Chuti chung pawh chuan harsatna a awm fo a, Gerrard ngei pawhin hrem chang a nei - English coach a awm tawh lo a, Morelos-a'n a ze ngai a chhuah leh ṭan.
Mahse, Van Bronckhorst-a'n striker nungchang ṭha lo enkawl a châk lo a, "Rangers tana inkhelh a duh tih min hmuhtir tur a ni," tiin Morelos chungchang a sawi a, PSV nena an inkhel tur pawimawhah a hruai lo!
Rangers tana European competition-a goal (29 goals) khung hnem ber hruai loa team ṭha PSV hmachhawn hi a huaisenthlak a, mahse, Dutch coach-in thutlukna a siam fuh tih pholangtu chu result a ni.
Morelos aiah Colak
"Ka aiawh Lal hmaa'n a ding..." tih ang maiin Morelos kawhmawh bawl karah Antonio Colak-a'n Colombian striker pheikhawk hnutchhiah chu zo takin a inthawlh a, a team tan goal hlu tak a khung leh ta.
Croatian striker hi Rangers-in PSV hmaa striker pangngai an hruai awmchhun a ni a, a pu rinna chhangletin a hna a thawk - Bayern Munich aṭanga Rangers-a loan-a khel Malik Tillman chuan PSV keeper Walter Benitez leh defender André Ramalho Silva ball inpe lai chu chhuhsakin, Colak tan a siamsak.
A hunah tak, a hmunah tak Colak a lo awm a, Croatia tana vawi thum inlan tawh striker tan goal-a chantir turin harsatna a awm lo - tun season-a match riat a khelh aṭanga goal nga a khungna chiah a ni.
Rangers hian goal an khung hmain Tom Lawrence hmangin chance duhawm an nei bawk a, mahse, Wales international hian ṭha zeta ball a control hnuah bar a tihper thei hram.
PSV an vanduai
Nistelrooy-a'n tun season-ah a vawi khat nan senior team a kaihruai a, Champions League erawh a khelhpui zo ta lo - inkhel a thlirlet ang a, an chance hlahte thlirin a ui vawng vawng ang.
Squad en mai chuan Dutch club hi team ṭha zawk an ni a, mahni muala khel an ni bawk - mahse, goal hmaah an vannei tawk lo a, chutihrual chuan Rangers game a ṭhat em avangin an duh ang hna an thawk thei lo.
PSV tan hian Philip Max chuan uiawm takin a khung thei lo a, Rangers goalkeeper Jon McLaughlin chuan Manchester United nena sawizawm hlawh mek Cody Gakpo hun ṭha neih a dansak bawk.
Ivory Coast international Ibrahim Sangaré-a'n tauh luh theihna turah a chance a chhawr lo a, tawnhriat nei ṭha Luuk De Jong chuan keeper McLaughlin zawnah bak a pet thei lo bawk a, PSV vanduai zan tiin a sawi theih.
Mangṭha Gerrard
Rangers-in Steven Gerrard an chân hnuah a hmun ruak luah turin Giovanni van Bronckhorst an lalut a, Stevie G hian kum 10 zet hnuah Scottish Premiership nomawi a chawipui kha a ni a, an tan chuan a hlu takzet.
Gerrard-a'n Aston Villa a pansan lai hian league-ah hma an hruai mek bawk a, Liverpool legend chhuah hun hi Rangers tan chuan a hun lo takzet. Mahse, kum 47 mi coach enkawlna hnuaiah Rangers-in Gerrard an ngai tawh lo.
Season hmasaah an champion nomawi humhim thei lo mah se Europa League final an thleng a, tun season-ah Champions League an khel leh dawn ta bawk - 2007-08 season hnua European club inelna sang ber group stage an inpetkai leh hmasak ber a ni.
Player a nih lai pawha Rangers tana lo khel tawh Van Bronckhorst-a'n kum 10 liam taa Scottish fourth division khel team kha European club inelna sang ber a thlenpui a, Gerrard-a tih theih loh titu hian Scottish Premiership-ah ro a rel thei bawk a nih ngat chuan, "Glasgow-ah chuan Gerrard hi kan pathian a ni," titu fan-te thinlung a nei tawh ang.
Inkhel dang
Champions League qualifier kaltlangin group stage khel turin club paruk an tling a, Nilaini zana Rangers, Dinamo Zagreb leh FC Copenhagen an tlin hma hian Thawhlehni zan khan Benfica, Viktoria Plzen leh Maccabi Haifa FC chu an lo tling tawh bawk.
Nilaini zan inkhel zingah Dinamo Zagreb chuan 4-1 in Bodo/Glimt an hneh a, chak tur hian extra time an mamawh thung - minute lina lekah Mislav Orsic chuan goal hmahruai khungin minute 35-naah Bruno Petkovic chuan a belhchhah.
Mahse Bodo/Glimt tan Albert Grønbaek chuan minute 70-naah a khung ve a, first leg-ah 1-0 a Norwegian club hi an chak avangin 2-2 a ni. Extra time khelh a ni a, hun tawp nan minute thum a la awm tihah Josip Drmic leh Petar Bockaj ten khungin Zagreb an tlang.
Hetihlai hian Turkish club Trabzonspor chuan mikhual team Copenhagen lakah goal an khung thei lo a, 0-0 in an inhnehtawk - first leg-a 2-1 a chak Danish club Copenhagen-in Champions League an khel dawn.
Champions League Playoff Results
August 16, Thawhlehni Zan
Champions Path - First Leg
Bodo / Glimt 1 - 0 Dinamo Zagreb
BOD: Amahl Pellegrino 37'
FC Copenhagen 2 - 1 Trabzonspor
COP: Viktor Claesson 9'; Lukas Lerager 48'
TRA: Anastasios Bakasetas 79'
League Path - First Leg
Rangers 2 - 2 PSV Eindhoven
RAN: Antonio Colak 40'; Tom Lawrence 70'
PSV: Ibrahim Sangaré 37'; Armando Obispo 78'
August 17, Nilaini Zan
Champions Path - First Leg
Qarabag 0 - 0 Viktoria Plzen
Maccabi Haifa 3 - 2 Red Star Belgrade
MAC: Frantzdy Pierrot 18', 51'; Tjaronn Chery 61'
RSB: Aleksandar Pešic 27'; Guélor Kanga 39'
League Path - First Leg
Dinamo Kyiv 0 - 2 Benfica
BEN: Gilberto 9'; Gonçalo Ramos 37'
August 23, Thawhlehni Zan
Champions Path - Second Leg
Viktoria Plzen 2 - 1 Qarabag
VIK: Jan Kopic 58'; Jan Kliment 73'
QAR: Filip Ozobic 38'
*Agg-ah 2-1 in Viktoria an tlang
Red Star Belgrade 2 - 2 Maccabi Haifa
RSB: Aleksandar Pešic 27'; Mirko Ivanic 43'
MAC: Daniel Sundgren 45+5'; Milan Pavkov 90' (OG)
*Agg-ah 5-4 in Maccabi an chak
League Path - Second Leg
Benfica 3 - 0 Dinamo Kyiv
BEN: Nicolás Otamendi 27'; Rafa Silva 40'; David Neres 42'
*Agg-ah 5-0 in Benfica an chak
August 24, Nilaini Zan
Champions Path - Second Leg
Trabzonspor 0 - 0 FC Copenhagen
*Agg-ah 2-1 in Copenhagen an chak
Dinamo Zagreb 4 - 1 (a.e.t) Bodø / Glimt
DIN: Mislav Oršic; Bruno Petkovic 35'; Josip Drmic 117'; Petar Bockaj 120'
BOD: Albert Grønbæk 70'
*Agg-ah 4-2 in Dinamo Zagreb an tlang
League Path - Second Leg
PSV Eindhoven 0 - 1 Rangers
RAN: Antonio Colak 60'
*Agg-ah 3-2 in Rangers an chak