Pichichi Trophy dawngtu Messi

Lionel Messi-a'n a duh ber La Liga nomawi chawi lo mah se mimal chawimawina erawh a hum haw leh ta tho a, Argentine striker hi a zawna a vawi li nan La Liga top scorer a ni - Pichichi Trophy a dawng. 

Argentine striker hian tun season La Liga-a match 33-a khelhah goal 25-a khung a, amah hnaih bertu Real Madrid striker Karim Benzema chuan goal 21 bak a khung thei lo. La Liga 2007-08 season khan Mallorca striker Daniel Guiza chuan goal 27 khungin Pichichi Trophy a lo dawng tawh a, tun season hi Guiza hnua goal 30 khung tling loin La Liga top scorer dinhmun a luah leh hmasak ber a ni.

Messi-a'n Pichichi Trophy vawi sarih a dawnna a ni a, heti zat dawng thei an la awm ngai lo. Kum 33 mi striker hian top scorer chawimawina a dawng a ni mai lo a, assist ngah lamah La Liga record thar a siam bawk. 

Barcelona thiampuipa hian Alaves laka Fati goal khung tur chu a siamsak a, tun season La Liga-a assist vawi 21 a neihna a ni - a theuneu lo hle. Catalan club tana Messi-a khelhpui ṭhin Xavi chuan 2008-09 season khan vawi 20 assist a lo nei tawh a, he record hi Messi chuan a rawn khum ta a ni. Argentine striker hian tun season-a league match 33-a khelhah goal 46 a thawk chhuak tihna a ni.