US Open khel lo tur Kerber

Hmeichhe world number 1 hlui Angelique Kerber chuan US Open a khel dawn lo. Hard court inelna lian a hmachhawn theih loh tur chhan hi nau a pai vang a ni a, tennis aiin a fa lo piang tur a ngaih pawimawh hmasak phawt a ngai.

Australian Open, Wimbledon leh US Open nomawi chawi tawh Kerber chuan, "US Open khelh ngei ka duh, mahse mi pakhat leh mi pahnih ṭangdun inhmachhawn chu a remchang lo ang," tiin a ruak lo tih a sawi a, a rai tih thukhuh takin a sawi chhuak.

German star chuan sawi zawmin, "Tun aṭanga thla eng emaw ti chhung chu tennis khelin ka zin kual rih lo ang, ka inkhelh theih loh hi chhan ṭha tak a nih avangin min ṭantute hriatthiamna ka ngen a, ka ngai dawn hle mai che u.

"New York khawpui hi chuan ka tennis zinkawngah hmun pawimawh tak a chang. Kum 2016 khan ka lo champion ve tawh a, Grand Slam nomawi ka chawi mai bakah world number 1 ka nih theihna chhan a ni," tiin a tan US Open a pawimawh thu a sawi.

US Open hi August 29, Thawhṭanni aṭangin an khel ṭan dawn. Tennis season khat chhunga an khelh ṭhin Grand Slam pali zinga a hnuhnung ber a ni tawh a, a hnu lamah major tournament a awm tawh dawn rih lo.